Australian Open women’s singles: Champ lai Keys hnawtchhuaktu Pegula

Australian Open women’s singles:
Champ lai Keys hnawtchhuaktu Pegula
Nimin, Thawhtanni khan American ve ve, thiandun inkawm ngeih tak inkhelah Jessica Pegula chuan Australian Open defending champion Madison Keys lakah minute 78 lek chhungin 6-3 6-4 hnehna awlsam pangngai tak nen a career-a a vawi kuana atan Grand Slam women’s singles quarter-final a lut a, semi-final luh inchuhah pawh a chipui tho Amanda Anisimova a hmachhawn zui leh ang.
Rod Laver Arena-a fourth-round match-ah nikum Melbourne Park final-a Sabalenka hneh ngattu ninth seed Keys hian unforced error 28 zet a nei.
Sixth seed Pegula nu leh pa kha billionaire niin, NFL club Buffalo Bills neitute fanu duat lai a ni.
Thawhtanni fourth round inkhel dangah United States player ve bawk kum 24-a upa Amanda Anisimova chuan 7-6 (7-4) 6-4-a Chinese player Xinyu Wang hnehin a vawi khatna atan Australian Open quarter-final a lut a, a hnampui Pegula nen semi-final luh an inchuh dawn a ni.
Fourth seed Anisimova hian Australian Open kal laiah set a la hloh lo a, nikum Wimbledon leh US Open final-a a chak loh ve ve avangin Melbourne Park-ah hian a major title hmasaber tur a sual leh mek a ni.
Kumin Australian Open hmeichhe singles hi American lamin an al hneh viau mai a, American dang pahnih Coco Gauff leh Iva Jovic-te pawhin Pathianni khan last eight hi an lo lut fel tawh a, tun hi kum 2001 hnu lam Australian Open women’s singles bika American player pali zetin quarter-final an luh vawi khatna a ni ta hial nghe nghe.
Nimin vek khan Wimbledon winner hlui Elena Rybakina pawhin Belgian 21st seed Elise Mertens hnehin kum 2023 hnu lama a hmasaber atan Melbourne Park-ah quarter-final a lut a; kha mi kum khan final hial thlengin, Aryna Sabalenka ngam ta lo a nih kha.
Kazakhstan star Rybakina hian last eight match pakhatah Australian qualifier Maddison Inglis veltu second seed Iga Swiatek lakah fiahna hraw zawk a hmachhawn leh dawn.
Poland chhuanvawr Swiatek hian fourth round match-a a tumpui home hope Inglis lakah harsatna sawi tham a tawk lo a, hun reilote chhunga 6-0, 6-3 hnehna kha Grand Slam title a la hawn ve loh awmchhun Australian Open title a beisei kal mekna kawngah fiahna a tling lo!
Dulthuar na avangin third round-a a tumpui tur Naomi Osaka a inhnukdawk a, inkhel hah loin kum 28 mi Inglis hian fourth round a lut a, tah chuan Swiatek a lo inhnukdawk ve tawh si lo a, world number 168 Inglis hi women’s singles draw-a Australian tla hnuhnungber leh a tawpna a ni ta!
Swiatek hian round hmasa lamah khan Russian Anna Kalinskaya paltlang turin set thum khelh a ngai a, tualchhung nula lakah erawh a sihhnip duh thak lo!
Six-times Grand Slam champion hian 2022 Wimbledon winner Elena Rybakina of Kazakhstan a hmachhawn leh ang a, hei chu fiahna tling deuh tura ngaih a ni!