Austria-a sikula silai hmeh puahah mi 11 thi

Austria-a sikula silai hmeh puahah mi 11 thi
Austrian khawpui pakhat, Graz-a sikula inpawngkahna thlengah mi 10 kah hlum an ni a, tun hnai kum eng emaw zat chhunga silaia inbeihna rapthlak ber a tling.
Police chuan a kaptu nia an hriat, mipa kum 21 mi, he sikula lut thin chu sikul bual inah a inkap hlum ve nghal niin an sawi.
He thil hi khawpui hmarthlang lama Dreierschützengasse secondary school-a thleng a ni.
Thite hi hmeichhia paruk leh mipa pathum niin Interior Minister Gerhard Karner chuan a sawi a. Mi dang 12 hliam tuar thenkhat pawh na deuh deuh an awm niin police-in an sawi.
Thawhlehni zanah khan hliam tuar hmeichhe pakhat a thi leh a, ani nen hian kah hlum hi mi 10 an tling.
A kaptu hi a hming puan a ni lo va, Dreierschützengasse-a lut ve thin, pass chhuak zo ta lo niin Karner-a chuan Thawhlehni chawhnua thuthar lakhawmtute a kawmnaah a sawi.
Titi leng a tam a, hengte hi criminal office-in an chhui zel tur thu a sawi a. Police chuan a tih chhan an la hre lo bawk.
Officer-te chuan he thil a thlen hma hian a kaptu hi an la hmelhriat ngai lo tih an sawi a. An hriat theih chinah mi kah nana a hman silai pahnih chu phalna neia a kawl a ni.
Tual chhung canchinbute chuan pistol leh shotgun a hmang niin an sawi a. Amah hi Austrian niin Graz region huam chhunga cheng niin amah chauhva che chhuak niin police-in an sawi.
Ni thum chhung Austria pumah sun tur niin ram pumah Nilaini chawhma dar 10:00-ah thite hriat reng nan minute khat ngawi renga hun hman a ni bawk.
President Alexander Van der Bellen-a pisa, Hofburg Palace, Vienna-ah chuan an ram puanzar chu a ngul chanvea zar a ni.
Inkahna a thlenna sikul hi thupek thar a awm hma chu khar a ni danw tih Education Minister Christoph Wiederkehr-a’n a sawi.
Austria-a APA news agency chuan thi zinga pasarih hi zirlai an ni tih a tar lang.
Police chuan inkahna hi an hriat veleh Thawhlehni chawhma dar 10:00 (India-a chawhnu dar 02:30)-ah beihpui an thlak nghal a. Hetiang lam thiam bik, Cobra tactical unit pawh sikulah hian tirh an ni.
Zirlai leh zirtirtute chu sikul atanga chhuahtir vek an ni a. Police chuan engmah hlauhawm a awm tawh lo niin an sawi.
Thawhlehni chawhnu khan Graz-a blood donation centre-ah thisen pek tum tam tak an inthar zui bawk.
Austria-ah hian kum 2020 khan jihadist Kujtim Fejzulai-a chuan Vienna-a zan lam hun hmanna district-ah mi pali kap hlumin mi 23 a lo kap hliam tawh a. Kum 2016 khan Nenzing khuaa concert-naah mi pakhatin mi pahnih a kap hlum a, a hnuah amah a inthat zui a, mi dang 11-in hliam an tuar bawk.