Austria leilungah Russell chak nawlh!

Austria leilungah Russell chak nawlh!
Pathianni Austrian F1 Grand Prix boruak sang takah Mercedes driver George Russell chuan rin loh takin hnehna a chang a, intlansiak tawp lama hmahruaitu nih inchuha inthlurbing Red Bull triple world champion Max Verstappen leh McLaren driver Lando Norris insu a hlawkpui a ni.
Thil tam tak thlenna Red Bull Ring-ah hian McLaren car khalhtu Oscar Piastri pawh lawmman semna dawhsanah kan hmu nawlh bawk a, pahnihnaah thlengin, Russell aiin second 1.906-in a tlai a; pathumna luahtu chu Ferrari khalhtu Carlos Sainz a ni.
Spielberg-a an hnehna sualchhuah kha hun engemaw laia Formula One intlansiak lo awpbet tawh thin Mercedes tan November 2022 hnu lama grand prix hnehna an chan leh vawikhatna niin, Mercedes chak hnuhnunber tum pawh khan Russell tho hi Brazil rama 2022 Brazilian Grand Prix-ah pakhatna a ni a, kha mi hnua race 33 a tlan leh hnuah Briton hian a Formula One career-a a vawihnihna atan race hnehna a sualchhuak leh ta a ni.
Chungnung zawk nih inchuha innawr nasa tak Verstappen leh Norris chetsual zar zoa hnehna chang nawlh Russell hian race fight ve tak tak thei tura an team pumpui hnathawh fakin, insutbuai (collision) kha thil thleng thei reng a nih thu leh midangte chunga thleng turin an suangtuah thin tih a sawi!
A chetsual avangin pangana daihah thleng mah se point hmu pha zawnga kal zui ta tho Verstappen chuan championship-a a hmahruaina belhchhahin, amah hnaihbertu Norris lakah point 81-in a sang.
Red Bull Ring-ah khan Russell hian pathumna a\angin bul a \an a; Verstappen erawh pole position luahtu niin, Austrian Grand Prix hnehna chang tura rinkai ber ni leh mah se Dutchman-in podium a lawnkai zo ta lo a ni.
Mercedes seven-times world champion Lewis Hamilton chu pit lane entry-ah white line a cross avangin five second penalty pek ni mah se palinaah a thleng pha tho a, ani pawh hian lawmman semna dawhsan a luah pha lo chiah chiah.
F1 history-ah season liamta kha team pakhatin intlansiak an thunun ngheh ber \um niin, race 22 awmah Red Bull kha \um 21 tehreng an chak a; kuminah pawh Verstappen thiamna leh an khawl chakna hmangin Red Bull hi rawn fawr leh viau bawk mah se intlansiak vawi 11 awm tawhah team hrang pali laiin race hnehna an chang tawh a; tah chuan Verstappen vawisarih chakin, Red Bull baka pakhatna dinhmun luah ve tawh dangte chu McLaren, Ferrari leh Mercedes. Kartawp Silverstone tlankawnga British Grand Prix inbeihna kan thlir leh turah pawh hian he tlankawnga hnuhma hraw lo hnutchhiah tawh Ferrari leh McLaren hi inthlahrung lo hle tura ngaih an ni a, Red Bull-te nen inbeihna lian leh sawilawk har tak a nih ngei a rinawm.