AVBD hnenah MP-in bus hlan
Lok Sabha MP Richard Vanlalhmangaiha chuan a MPLADS hmanga blood donation bus tur Tata Winger new nodel ( mi 13 thut theihna) a lei chu Inrinni khan Association for Voluntary Blood Donation Mizoram (AVBD) hnenah a hlan.
MP chuan thisen pek a ngaihpawimawh thu leh amah pawhin thisen a pek ve thin thu a sawi a; AVBD-in a hnena bus an dil pawh tihhlawhtlin ngei a duh a, blood donation bus thar chu a MP Fund hmanna puitling hmasa ber a ni tih a sawi.
“Bus thar hian Blood Bank-a thawktute rilruah phurna leh inpek lehzualna thar tuh se, damlo thisen mamawhten a hun takah thisen dawn theih phahnan hmang ngei se ka duh a ni,” a ti.
AVBD president C Lalnunnema chuan, an dilna ngaipawimawha MP-in bus a pe chu an lawm takzet tih a sawi a. Civil Hospital Aizawl senior medical superintendent Dr Lalchhuankimi pawhin Lok Sabha MP-in AVBD hnena bus a pek, Civil Hospital hman atana ruahman a ni chu an lawm a, tangkai taka hman a ni dawn tih a sawi a ni.
Blood donation bus tur hi 2024 October vel atangin buaipui tan a ni a, air condition-a thuam niin, Rs 18,22,027 senga lei a ni.
AVBD Mizoram chuan an dilna ngaihpawimawh hmasaa a neih avangin Lok Sabha MP Richard Vanlalhmangaiha chungah an lawm tazket tih an sawi a ni.
Get real time updates directly on you device, subscribe now.