Award dawngtu nurse chawimawi
Award dawngtu nurse chawimawi
Nurse chawimawina sang ber – National Florence Nightingale Award dawngtu Civil Hospital Aizawl nursing officer V Lalhmangaihi hnenah Mizoram sawrkar aiawhin Health minister Lalrinpuii chuan Thawhlehni khan chawimawina thuziak leh sumfai Rs. 50000 a hlan.
Health minister chuan, India ram state hrang hrang mipui tam tak karah Mizo zinga Florence Nightingale Award dawng thei kan awm thin chu a lawmawm tih a sawi a. A dawngtu thawhrimna leh inpekna entawntlak a tih thu a sawi.
Award dawngtu V Lalhmangaihi chuan he lawmman dawng thei tura a tul anga buaipuitu Mizoram Nursing Council chungah lawmthu a sawi a. Mizoram sawrkarin cabinet pawmpuinaa kumin atanga dan mumal tak siama lawmpuina thuziak leh cash award a hlan tel chu a lawm hle tih a sawi a ni.
Chawimawina hunah hian Mizoram atanga he award lo dawng tawhtute zinga Aizawl district-a awm mi panga pawh sawm tel an ni.
He chawimawina dawng tur hian India ram state hrang hrang atangin nurse hna thawk tha bikte nominate thin an ni a, recommendation chu sawrkar laipuia thawn a ni. Sawrkar laipui hian committee bik siamin dawng awma an ngaihte an lo thlang leh thin a. Tun tum ami nen hian Mizoram atangin nurse 17-in an dawng ta a ni.