Awmze nei zawka Hindi zirtheihna atan inrawnkhawm

Mizoram Education Reforms Committee buatsaihin Zirtawpni khan Hindi zirna chungchangah inrawnkhawm a ni a. Hindi zirna lama thawktute leh mithiamten Hindi zirna tihhmasawnna tur an sawiho.
School Education director Angela Zothanpuii chuan Mizoram pawn school thaa Mizo naupang an kalin an buai thin a, puitling pawh Hindi thiam lo chu hnamdang zingah kan buai thin, tiin, kan Hindi zir dan siamthat tulna a tam avangin inrawnkhawm a pawimawh tih a sawi a ni.
Education consultant Rev Dr K Thanzauva chuan Hindi zirtirnaa Mizoram dinhmun a sawi a. Sawrkara thawk Hindi zirtirtu 1393 awm zingah regular 538 leh contract 855 an ni. High school-ah 440 an thawk a, middle school-ah 953 an awm. Mizo zirlaiten Hindi an zir nep em avangin an thiam tak tak lo nia a hriat thu a sawi.
MERC working chairman Prof Lalbiakdiki Hnamte chuan, kan Hindi zirtir danin a thlen chin leh duhthusam lohna lai a sawi a. Ziak leh chhiar thiam mah ila, a awmzia kan hriat loh dan, mi zingah kan tawng thiam loh dan a sawi. Tuna kan zir dan chu a taka hmannaah awmzia a nei tawk loa a hriat thu sawiin, hma sawn turin tan lak a ngai tih a sawi.
Inrawnkhawmnaah hian School Education officer-te, MBSE, SCERT, Samagra Shiksha officer-te, Education Reforms Committee member, Hindi zirtirna hmun hrang hranga hotute, Hindi Education officer-te, Hindi Teachers Association hruaitute leh zirlai pawl hruaitute an tel a ni.