Mahmuaka Chhakchhuak
-- Advertisement --
Ram hruaitu thar kan neih ang bawkin kalphung tharin kan kal chho mek a. Kan ram hruaitute pawhin ngaihtuahna thar an hmangin thil thlak danglam leh thil thar diai pawh hmuh leh hriat tur a awm chho mek zel bawkin rahbi thar kan rap chho mek a, a lawmawm hle. Chutih rualin mipui lam erawh chuan kalphung thar chu a thatna emaw a that lohna emaw lam aiin kan ze ngai bawkin ‘phunchiar stage’ ah kan la awm char char zawk niin a lang a, a pawi hle.
Kan Chief Minister thar chuan Dec. 8, 2023 (Zirtawpni)-ah Ni Za chhunga tih tur puangin Raj Bhavan Durban Hall-ah thuthar thehdarhtute hmaah a sawi nghe nghe a nih kha. Chutiang bawk chuan June 10, 2024 (Thawhtanni) ah Dawrpui Multipurpose Hall-ah Council of Minister, Adviser to CM leh sorkar officer liante nen inkawmhona hun an hmang lehin chutah chuan CM chuan sorkar hnathawkte leh ram hruaitute thawhho a pawimawhzia pawh sawiin ‘Minister-te hi official tel loin kan corrupt ve thei miah lo, nangni erawh chu kan tel loin in corrupt thei. Min thurualpui reng reng suh u, kan eiru dawn lo, i eiru lo tlang ang u. Mipuiin politician-te min hmuh dan ‘Ei ru thin, mi bum ching, dawt sawi thin, tlinna tur a nih chuan tihhreh engmah nei lo. Kan bureaucrat-te pawh mahni tanghma ringawt hai, kaisanna tur ringawt leh hlawh tam ringawt buaipui, eiruk hreh lo. Politician-te leh Official-te mipuiin min hmuh dan hi vawiin atangin her danglam rawh se, mipuiin an rawngbawltuah min ngai rawh se a tihte hi ram hruaitute hnen atanga ngaihthlak ngai loh tak a niin thu ngaihthlak nuam tak a va ni em.
Lincoln-a’n ‘Democracy is the people, by the people, for the people’ a tih angin mipui sukthlek hi ram hruaitute ngei pawhin an thlir reng fo a pawimawh a, mipui duh dan loh zawng emaw mipui ep zawnga kal an hlauin fmkhur takin ruahmanna pawh an nei thin reng bawk a. UK Prime Minister David William Donald Cameron ngei pawh khan kum 2011-a European Union Treaty a hnawl chhan kha mipui ngaihdan a lak vang nia sawi a ni a, Scotland zalenna chungchangah pawh kum 2014-ah khan mipui ngaihdan a la leh a, chutiang zelin kum 2016-ah pawh mipui ngaihdan a lak leh avangin Prime Minister dinhmun atangin a lo chawl leh a. Amah lah chuan a nupui bulah ‘Mipuite duh dan hi zah leh pawisak a ngai, October thlaa Conservative Party Conference hma-in ka kiang ang’ tiin a sawi mai a. Chuti chuan May 11, 2010 atanga Prime Minister thutthleng a luah chu July 13, 2016-ah chuan a lo thawhsan ta a ni. Hetianga mipui ngaihdan pawisa takte hi ngainat leh fak pawh an hlawh viau thin.
Kan ramah erawh chuan hetiang hi a letling hlauh emaw tih zawk mai tur a ni a, tute pawh ram hruaitu niin tu pawh Chief Minister pawh lo nisela lawmna reng reng nei lo ang maiin kan phunchiar em em nghal a. Party ruihchilh hi mipui zingah hian kan lo tam viau nge ni tih erawh chu hre kher lo mah ila heti em em hi chu mi pangngai zia chu a ni lo deuh lawng maw tih tur hi a awm fo mai. Chhungkaw pa ber thiltih leh hnathawhte fate’n an sawisel reng angah han tehkhin ta ila, pa ber tan chuan hmunphiah bawk lama vuak hrep a chakawm duh viau ngei ang.
Kum 1972, mahnia rorelna fawng kan chelh tan atang khan han thlir ila kan ramah hian mipui duh dan taka ram hruaitute rorelna hi ala awm ngai lo a tih theih ang. Mipui kan phunchiar a, ram hruaitute kan duhkhawp lo a, kan sawisel reng a, vawiin thlengin kan la sawisel reng bawk zel a. Sawisel thiang lo erawh an ni bik hauh lo a, kan sawisel tur a ni, amaherawhchu sawiselna tur hmun erawh kan hre tur a ni a, mahni tapchhak zawl atanga lo sawisel ve chiam chiam khan kawngro a su vak lo mai thei. Tun sorkar phei hi chuan sawiselna/lungawilohnate thlenna tur bawm an ruahman lehnghal a, online pawhin a theih a, lehkha thehluhna tur hmun pawh an ruahman bawk avangin hengte hi hmang tangkai ila a sawt viauin a rinawm.
Social media kan ti a, duh duh sawi theihna hmun emaw kan tiin mahni nihna nena inhmeh lo tak tak leh mizo kan nihna hrim hrim nen pawha inhmeh lo takin hmeichhiate aiin mipa zawk kan han tawng thei viau zelte hi chu a zia lo ngawt mai. Social media lama kan chetphung en hi chuan hnam ropui tak kan ni lo tawp mai tih a chiangin hnam dingchhuak tur pawh hi kan ni lo mai ang ngem tih mai tur a ni a. Hetiang, thu sepsel te te (‘MLA pakhat, Zu duh lutuk’ tih Zoram Politics Group-ah) tih ang chi hi chu nupui fanau nei chin tawhte hi chuan sawi sawi lo teh ang u, an duh leh party ruihchilh hoin lo sawi mai mai sela, mi pangngaia inngai chin tan chuan sawi tur chin hriat hi a tha. Kan sawiselna tawngkamte lah hi a chhe hlawm si a, hetiang tak hian a ni maw kan lo inhmelmak zawh tih awl tak tur a ni.
Ram hruaitute hi an fel famkim e, an tha famkimte tihna erawh a ni hauh lo a, mize tha lo deuhte pawh an awm mai thei e. Amaherawhchu mipui rawngbawl tura penchhuak tawh an nih vang tal pawh hian that an chhuah tur a niin fel taka ram hruaina hna thawh pawh an tum tur a ni. Chumi kawngah chuan a nachang hriate chuan kawng pawh an kawhhmuh tur a niin an fel lohna leh tlin lohna laiah dawmkangtu pawh an mamawh ngei bawk ang. Chutiang thurawn chu tuna kan ram hruaitute hi chuan lawm taka an dawnsawn thin pawh a rinawm a, an inhawng viau bawk a ni. Chutianga awmze neia sawiselna chuan rah tha zawk pawh a chhuah ngei a rinawm a, mipui lam pawhin kan chin chhunzawm zel atan a duhawm hle.
Ram hruaitu lu berin Politician-te leh Official-te mipuiin min hmuh dan hi vawiin atangin her danglam rawh se, mipuiin an rawngbawltuah min ngai rawh se a tihte hi thil pawimawh tak a ni a, sawi uar chi tak pawh a ni. Hetianga ram hruaitu berin a sawi ngat chuan ram hmelhmang pawh a danglam ngei bawkin a rinawm a, mipuite pawhin chutiang chu kan beisei zel pawh a tha ngei ang a, mipui chunga leng niloa mipui rawngbawltu anga an awm ngei pawh a rinawm. Lunglei khawpuia MLA Office a han awmte hi mipui tana rawngbawlna pawimawh tak a ni a, a lawmawm ngawt mai. Hetiang taka ram hruaitute mipui tana rawngbawl tura an inbuatsaihnaah hian duhkhawp lohna kan nei a nih pawhin sawiselna hmun tur taka sawiselin social media lama ang dur dur loin awmze neia sawiselna thlen hi mi puitling zia a ni ngai e.