B Lalthangliana hnenah Mizo Award

On Dec 13, 2025 2 0

B Lalthangliana hnenah Mizo Award
Mizo zinga mi hmingtha, ram leh hnam tana thawh hlawk leh chhuanawm bik nia a thlante hnenaVanglaini chanchinbuin kum thum dana a sem thin ‘Mizo Award’ chu kumin atan historian B Lalthangliana hnenah hlan a ni.
Award dawngtu thlang tur hian Selection Board din a ni a. Kumin Selection Board-ah hian chairman Vanneihtluanga a ni a, member dang chu – Prof. Malsawmliana, Dr Rohmingmawii, Adam Saprinsanga leh F Vanlalrochana an ni.
Mizo Award hlanna inkhawm hi minister pahnih – Vanglaini editor hlui K Sapdanga leh Vanglaini joint editor hlui Lalnghinglova Hmar ten an hmanpui a; sawmbik mi engemawzat an tel.
Mizo Award hmasa ber chu kum 2011 khan chief minister hlui Brig T Sailo hnenah hlan a ni a; kum 2014 khan TNT dintu Sangthankima hnenah hlan niin, kum 2017 khan Prof. Joy L Pachuau hnenah hlan a ni.
Covid leng vangin kum 2020 khan hlan theih a ni loa, Covid leng kian hnu, kum 2022 khan sem lehin, zirna sang (higher education) lama thawh hlawk Dr Tawnenga hnenah hlan a ni.
Award hian nomawi leh sumfai a keng a; kum 2011 leh 2014-ah cheng nuai khat, kum 2017 atangin nuai hniha tihsan a ni.
Mizo Award 2025 dawngtu B Lalthangliana hi Mizo chanchin zirchianga mumal taka chhuitu, Mizoram chhung leh pawna Mizote leh Mizo history thlunzawma tizautu, mi nawlpui hmuh theiha pholartu hmasa leh langsar ber nia sawi a ni a; a thawhrimna leh taimakna vangin Mizo history tam tak hriat a ni. Mizo hnam tobul chhuinaa sulsutu a nih bakah scholar-te tana thil thlir dan thar petu a ni.