Bad Bunny ‘Debí Tirar Más Fotos’ No.1 a kai thar leh ta

Bad Bunny ‘Debí Tirar Más Fotos’ No.1 a kai thar leh ta
Bad Bunny album ‘Debí Tirar Más Fotos’ chu Billboard 200 (albums) chart No.1 a kai thar leh a, he album hi a vinyl an tlangzarh thar a, hei hian hralh a tikal thar a, chart No.7 atangin No.1 a invawrh kai leh a, a zawn lovin kar li a No.1 tling ta. Hetihrual hian Latin music tan chanchin lawmawm a awm a, Fuerza Regida pawh a vawi khat nan Billboard 200 chart top 10-a lang thei album neiin, an band album ‘111XPANTIA’ chu No.2-ah a debut a, heti hian kum 69 chhung chart ranking an siam tawhah a vawi khat nan Spanish tawng album Billboard 200 chart No.1 leh No.2-ah a rualin an awm a, hetihrual hian 111XPANTIA hi solo artist ni lo, group anga Spanish tawng album he chart-a thleng sang ber niin, regional Mexican music album zinga he chart-a thleng sang ber a la ni bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni. US chart hi a pawimawhna chhan chu khawvela market lian ber a ni a, US-a lar chu khawvel huapin a lar deuh tlangpui a, zaithiam te pawhin US-a lar leh Billboard chart ranking a lan hi an thlakhlelh a ni tlat.
‘Debí Tirar Más Fotos’ hi kar khat chhungin 84,500 an hralh leh a, chung zinga 48,000 chu vinyl hralhna niin, streaming atangin 36,000 (on-demand official stream maktaduai 50.27) a tling a, album-a hla a mala hralhna atangin 500 a tling thei bawk. He album hi kumin January thla tira tlangzarh kha niin, February thla tir lam thlengin a zawin kar thum chhung No.1 a ni a, chumi hnuah a tawlh ta hret hret a, tunah a vinyl an tlangzarh avangin hralh a kal thar leh ta a ni.
Fuerza Regida album thar ‘111XPANTIA’ chu 76,000 hralhin No.2-ah a debut a, 39,000 chu album tak tak hralhna niin, streaming atangin 37,000 (on-demand official stream maktaduai 50.44) a tling a, album-a hla a mala hralh chu chhiar tham a ni lo.
111XPANTIA hian Billboard 200 chart-a lang thei album an neih parukna niin, chung zinga pathum chuan top 40 a kai a, tun hi chart top 10-a kai vawikhatna a ni.
Chart top 10-a lang dang album dang, No.3 atanga No.7 te chu chart No.1 hlui vek an ni a, SZA ‘SOS’ chu 52,000 hralh lehin, No.2 atangin No.3-ah a tawlh a, Morgan Wallen ‘One Thing at a Time’ chu 46,000 hralh lehin, No.4-ah a la awm a, Kendrick Lamar ‘GNX’ chu 45,000 hralh lehin No.3 atangin No.5-ah a tawlh a, Sabrina Carpenter ‘Short n’ Sweet’ chu 41,000 hralh lehin No.5 atangin No.6-ah tawlh a, PARTYNEXTDOOR & Drake ‘$exy $ongs 4 U’ chu No.5 ataning No.6 atangin No.7-ah a tawlh ve ta bawk.
Key Glock album thar ‘Glockaveli’ chu chart No.8-a a debut a, he album hi 34,000 hralhin, chung zingah 28,000 chu streaming atanga album tlukpui (on-demand official stream maktaduai 37.28) niin, album tak tak hralh chu 6,000 a ni a, album a hla a mala hralhna chu chhiar tham a ni lo. ‘Glockaveli’ hi Key Glock album he chart top 10-a lang thei palina a ni.
Chart No.1 hlui Morgan Wallen ‘Dangerous: The Double Album’ chu 33,500 hralh lehin No.10 atangin No.9 a kai thar leh a, Shaboozey ‘Where I’ve Been, Isn’t Where I’m Going’ chu 32,000 hralh lehin No.8 atangin No.10-ah a tawlh ve thung.