Badminton tournament lian \an dawn

Mizorama badminton inelna ngaihlut hlawh ber leh lian ber, player-te paw’n champion an chakna ber tournament ni bawk NEXA GIG Motors MBA Official Championship 2024 (Junior & Senior) chu vawiin, June ni 25, 2024 atang hian Ramhlun Indoor Stadium-ah khelh tan a ni dawn.
Mizoram Badminton Association (MBA) buatsaih tournament hi chi hniha then niin, junior category bik hi June ni 25-29, 2024 chhungin khelh zawh hman a ni ang a, Under-11 atanga Under-19 inkar category hrang hrang 16-ah inelna buatsaih a ni ang.
Senior Official Championship bik hi July ni 2-6, 2024 chhunga khelh tur a ni ve thung a, category panga, he’ng – men’s singles, women’s singles, men’s doubles, women’s doubles leh mixed doubles-ahte hian inelna huaihawt a ni thung dawn a ni.
MBA Official Championship hi Badminton Association of India (BAI) calendar-a lang phak tournament niin, NEXA GIG Motors-in an sponsor a, co-sponsor engemawzah dang an awm bawk.
Junior Championships bikah hian category hrang hrang 16-ah inelna hmachhawn tura hming pe player 215 an awm a, entry 279 teh meuh lutin, match 280 chuang en tur a awm dawn.
Under-15 boy’s singles (BS)-ah entry 47 lai awmin, category pakhata entry luh tamna ber a ni.
Chhuak tur an tam tham deuh avangin junior category bik hi hmun hnihah khelh a ni dawn a, Ramhlun Indoor Stadium bakah Govt. Mizo High School Hall, Chanmari chu a tir lamah hman tel a ni dawn a ni.
En bik tur player thenkhat
Kar kaltaa Hyderabad-a zawh fel tak All India Sub-Junior National Ranking Tournament-a bronze medalist Sainunmawia Sailo, Ramhlun Venglai khan category pathumah inelna a hmachhawn dawn a, junior mai bakah senior category pawh a khel tlang nghal ang.
A u Saitluangpuia Sailo hi senior championship khel turin a rawn haw dawn bawk. Anni unau hi KPGBA-a badminton zir mek, tun dinhmuna Mizo player tha berte zinga mi an ni.
KPGBA-a inzir mek dang Malsawmhlua (Mama), Serchhip, National Ranking Tournament-a champion thei leh vawi 4 lai medal lo awrh tawh pawh category pathumah tho a hmel kan hmu dawn a; BAI-in badminton thiam bikte inzirna atana a din National Centre of Excellence, Guwahati-a hun puma training nei mek C. Lalramsanga, Durtlang hmel pawh kan hmu bawk ang.
He hmuna inzir mek dang Lalrempuii, Serchhip pawh official championship khel turin a rawn haw a, category pakhat mai loa champion tura rinkai zingah a tel. Anni pahnih tangdun hi North East India mixed doubles champion lai an ni nghe nghe.
Anni bakah KPGBA-a training nei mek H. Lalrinhlui, Chanmari West leh Zoramthari Renthlei, Champhai Vengthlangte hmel pawh kan hmu dawn a, national level-ah pawh a tha pariat zinga lang phak deuh reng an ni.
ITM University Badminton Academy-a inzir mek Vanlalpekhlua Sailo leh Vanlalhruaia Sailote unau pawh he tournament lian khel tur hian an rawn haw bawk.
Anup Sridhar Badminton Academy, Bangalore-a traning nei mek Lalrinkimi (Mission veng) pawh he tournament-ah hian a rawn inlan dawn a ni.
Junior category-a chhuak tur player-te hi senior level-ah pawh an hmel kan hmu dawn hlawm a; a chunga kan tarlante bakah TATA Trusts (NEIDA) leh MBA-te thawhhona atanga din, Aizawl leh Serchhipa Regional Intensive Training Centre-a coaching kal mekte an tel vek dawn a; Grassroot Centre kalpui mekna hmun 25 atangin player an rawn inlan nual dawn bawk.

Hmeichhe lawmman pung dawn
Women and Child Development, Govt. of Mizoram, TATA Trusts (NEIDA) leh MBA-te thawhhona hnuaiah tournament-a hmeichhe chhuak an pun theihna’n hma lak a ni a, lawmmana an dawn pawisa fai a pun belh dawn bakah Grassroot Centre tithate tan lawmman siam a ni bawk.
He thawhhona hi Mission Shakti hnuaia Beti Bachao Beti Padhao (BBBP) programme hnuaia kalpui niin, Women and Child Development, Govt. of Mizoram-in Rs. 1,00,000 tumin, TATA Trusts lamin hemi atan bik hian Rs. 55,000 an thawh bawk
TATA Trusts hian ‘Girl Child Promotion’ hnuaiah programme chi hrang hrang an siam a, chu’ng zinga pakhat chu he thawhhona hi a niin, MBA-in pawisa a dawnte hi Grassroot Centre tha, hmeichhe lam tana coaching kalpui tha leh chetthatpuite lawmman atan leh championship-a hmeichhe tel, tithate pawisa fai dawn belhchhahna atan hman a ni dawn a ni.
He tournament hi nitin a bul atanga a tawp thlengin Mizoram Badminton Association YouTube channel-ah en theihin live-a pekchhuah a ni thin dawn a ni.

Category hrang hranga entry luh dan:-

U-11 Boy’s singles : 19
U-13 Boy’s singles : 34
U-15 Boy’s singles : 47
U-17 Boy’s singles : 28
U-19 Boy’s singles : 21
U-11 Girl’s singles : 15
U-13 Girl’s singles : 20
U-15 Girl’s singles : 18
U-17 Girl’s singles : 8
U-19 Girl’s singles : 8
U-13 Boy’s doubles : 14
U-15 Boy’s doubles : 12
U-17 Boy’s doubles : 13
U-19 Boy’s Doubles : 12
U-13 Girl’s doubles : 6
U-15 Girl’s doubles : 8