BADP thlakna tur VVP-II hman thuai theihnan minister-in tihfel ran a ngen

BADP thlakna tur VVP-II hman thuai
theihnan minister-in tihfel ran a ngen
New Delhi-a sawrkar laipui hotute dawra kal Rural Development & Administration minister Prof Lalnilawma chuan Border Area Development Program (BADP) thlaktu tur Village Vibrant Programme-II chu Mizoram leh hmarchhak state-ten a ranglama an hman tangkai theihnan tih fel ngai tifel thuai turin a thlen.
Sawrkar laipui Ministry of Home Affairs-a Border Management secretary Dr Rajendra Kumar hmu in, VVP-II chu Mizoram leh hmarchhak state-ten a ranglama an hman tangkai theihnan inkaihhruaina tihchhuah thuai a tul tih a hrilh a. Mizorama khaw tam tak, tuna VVP-II a la tel lo khua, tel thei si te chu a tahtawla telh zel nise tiin a thlen bawk.
Border Management secretary hian VVP-II chu peih a nih veleh a sanction order pawh ministry lam an inpeih tih sawiin, state sawrkarin sum an dawn hmang zo thuai thin turin a lo chah. VVP-II hnuaia thingtlang khua la telh ve lohte pawh budget hman phawt a nih hnu ah ennawn theih a ni dawn tih a lo hrilh.
RD&A minister hian Ministry New and Renewable Energy secretary Santosh Sarangi a hmuhnaah Mizoramah Rural Development & Administration department-in bio-gas lam kaihhnawih a khawih dawn tak avangin hmalak dan tur a sawipui a. Mizoram tan target pawh siam thuai a nih tur thu a lo hrilh.
Ministry of N&RE secretary chuan June thla chhung khian Mizoramah bio gas chungchang workshop rawn buatsaih an tum tih a hrilh bawk.
Disaster Management & Rehabilitation minister ni bawk Prof Lalnilawma hian National Disaster Management Authority (NDMA) director Mrinali Srivastava chu New Delhi Mizoram House-ah a kawm a. Tunhnaia Mizorama chhiat tawhna thleng sawipuiin, NDMA atanga tanpuina awm thei tur an sawidun a ni.