Bagan in hma an hruai zel

Inrinni zan khan Indian Super League (ISL) 2024-25 khelh chhunzawm a ni a, hmahruaitu Mohun Bagan Super Giant chuan an mualah hnehna changin an hmahruaina an tizau. Inkhel dangah Bengaluru FC chu an mikhual FC Goa nen an inhnehtawk a, an mualah tlawm lovin an kaltluang zui zel. Mohun Bagan leh Bengaluru te hian table chung lam an luah dun.
Hmahruaitu Mohun Bagan Super Giant chuan Vivekananda Yuba Bharati Krirangan Stadium-ah Kerala Blasters an mikhual a, an mualah 3-2 in hnehna an chang. Bagan hian goal thun hmasa zawk mah se si an phur let a, an mualah an tlawm teuh hle. Si an phurh reng hnuin hun tawp dawn hnaihah goal hnih an thun a, hnehna pawimawh tak changin point thum an hmu.
Table-a hmahruaitu Mohun Bagan tan hian Jamie Maclaren chuan minute 33-naah hmahruaina goal a thun. He goal hmang hmahruai bawk mah se chawlhlawk hnu lamah goal an chhuah thuai thung. Mikhual team Kerala Blasters tan hian Jesús Jiménez chuan minute 51-naaha goal thunin an si phurh a sut a. An si phurh an sut hnuin an phur thar viau a, minute 77-naah Milos Drincic chuan hma an hruai letna goal a thun zui leh. Hma an hruai let hnuin chak tumin thapui thawh mah se an him tluan thei lo. Bagan tan hun tawp dawn hnaih minute 86-naah Jason Cummings chuan goal thunin an si phurh a sut a. Hun pangngai tawk hnu minute 90=5-ah Alberto Rodríguez chuan goal pawimawh tak a thun a, an mualah hnehna hlu tak an chang zui ta a ni.
Kolkata club lian Mohun Bagan Super Giant hian season kal mekah vawi 11 khel tawhin point 26 an hmu a, table chung ber an luah chhunzawm zel. Mohun Bagan hi an hnuai chiaha awm Bengaluru FC aiin vawi khatin an khel tlem zawk a, point hnihin an chang zawk tho thung.
Inrinni zana inkhel dangah Bengaluru FC chuan an mikhual FC Goa lakah si hnih an phurh hmasak zet hnuin tlawm an pumpelh hram a, season kal mekah an muala an khelh that an chhunzawm. Sree Kanteerava Stadium a lenglut FC Goa tan hian Sandesh Jhingan chuan minute sarihna lekah hmaahruaina goal a thun a. Minute 66-naah Sahil Tavora chuan an goal hnihna thunin an hmahruaina a tizau. Sihniha an hnufual hnuin Bengaluru FC in an si phurh sut ngei tumin tan an khawh a, goal hnih an thun ve ta nge nge.
Bengaluru FC tan hian Ryan Williams chuan minute 71-naah goal thunin an si phurh a sut then a, Jorge Pereyra Díaz chuan minute 83-naah goal thunin an si phurh a sut zo va, an mualah tlawm nei lovin an kal tluang zel. Season kal mekah an muala la tlawm lo Bengaluru FC hian khelh 12 atangin point 24 an hmu a, table-ah pahnihna an luah.