Bail-a chhuah phalsak Dani Alves

Brazil footballer Dani Alves chu Barcelona court-in pawngsual thubuaiah thiamloh chantirin, kum li leh a chanve lung ina tang turin a hrem a, a chunga hremna tla a khinlet mek laiin court chuan euro maktaduai khat (£853,000)-in bail-a chhuah a phalsak.
Convict a nih hmaa a tan chen tur hun engemawchen lo tang tlingtla nual tawh Alves hi Barcelona court chuan Nilaini khan bail-a chhuah phalna hi a tichhuak a, mahse, a chhuah lailawk laia Spain ram a chhuahsan lohna’n a Brazilian leh Spanish passport chu thuneitute hnena a thehluh a ngai thung.
Bail-a a chhuah lai hian chawlhkar tin emaw koh a nih hun hunah emaw court-a inlan tura tih a ni a; a zalen chhung hian pawngsuala puhtu chu Alves hian metre 1,000 (3,300 feet) aiin a hnaih thiang lo bawk.
Football history-a player hlawhtlingberte zinga tel pha Alves hi khawvela club ropui ber ber Barcelona, Juventus leh PSG defender hlui niin, tarlan tawh thin ang khan, Barcelona khawpuia nightclub pakhatah Spanish hmeichhe pakhat pawngsuala puh a ni a; he thil thlen hun hi kum 2022 December thla kha niin, toilet chhungah Alves hian hmeichhia hi thlemlutin, tharum hmangin a pawngsual ta niin court-ah tarlan a ni.
Nikum January thla atang khan lung inah hun a hmang ta char char a, kumin February thla khan a thubuaiah thiamloh chantir niin, kum li leh a chanve tang tura tih a nih bakah pawngsual tawktu hnena euro 150,000 pe tura tih a ni bawk.
A chunga hremna hi court sang zawkah a khinglet a, la ngaihtuah that leh tur a nih laiin bail-a chhuah phalsak a ni ta a ni.
Pawngsual tawka insawi ukilte chuan kum 40-a upa Alves hi kum kua tal tang turin court an ngen a, mahse, heti zat em em chu court lamin a pawm lo a, kum li leh a chanve a tan turah hian thubuai rel fel hmaa a lo tan tawhte kha chhiar tel tur a ni.
Nilainia court-in bail phalna a pek hnu lawkah pawngsual tawktu ukil Ester Garcia chuan RAC1 radio station hnenah an lungawiloh thu sawichhuak nghalin, “Inngaihtuahbuai hauh loa bail pawisa euro maktaduai khat phawrh nghal thei tur tih hriatsa reng zalen taka chhuah an phalsak hi ka ngaihdan chuan ‘scandal’ a tling hial mai,” a ti a, court rorel dan mak a tih thu leh an rama rorelna kalphun (justice or system) chu mihausate tana duan ni hiala a ngaih thu a sawi!
Alves hian kum 2022 khan Mexican side Pumas UNAM zawmin, a vanglai pel tawh mah se thla khatah euro 300,000 tehreng a la hlawh pha a, mahse, lung ina nawrliam a nih hnu lawk khan a club vawn lai chuan a contract an titawp zui ve nghal a ni.
Brazil player hlui hian Barca tan game 400 chuang khel tlingin, tum hnih zawma Catalan team a zawm chhung khan league title paruk leh Champions League trophy pathum a lakpui hman a; Brazil 2022 World Cup squad-ah a tel bawk.
Ram ta na match 126 khel tling Alves hian Sevilla, Juventus leh PSG thuam inbel chungin trophy engemawzat a thawkchhuak bawk a, footballer hlawhtling leh hausa tak a ni.