Ballon d’Or boycott leh Guardiola

Ballon d’Or boycott leh Guardiola
Ballon d’Or thlannaa Vinicious Junior sang ber loin sawi zui a hlawh luih luih laiin Manchester City manager Pep Guardiola a midfielder Rodri thlavang hauhin, a chipui chu Ballon d’Or dawn phu hliah hliah a nih thu a tarlang a, Real Madrid-in awards ceremony an boycott chungchanga a ngaihdan an zawh erawh an ‘an thu alawm’ ti bakin a chhang thui tha duh lo.
Guardiola hi award dawng tura Vinicius Jr thlan a nih loh avanga a khelhna club Real Madrid-in Paris ceremony kal an thulh leh tak chungchanga a ngaihdan an zawt a, “Award dawngtu kha an lawmpui duh a nih chuan a tha a, an duh lo a nih pawhin a tha tho a, an thu thu a ni e. Keini, Manchester City lam chu club dangte khawsak dana tehfung lo khai tur kan ni lo,” a ti fel et!
Real hmelma lianber Barcelona boss hlui Guardiola chuan, “Manchester City mi leh sa zawng zawng leh kan fan-te chuan Rodri hi kan chhuang em em a ni,” tiin nizan League Cup fourth-round match pakhata Tottenham Hotspur an luhkhung hma lawk khan a sawi.
Spaniard hi Norway striker Erling Haaland lamah a pakai a, nikum lamah goal 50 thunin City chu treble champion nihpui mah se Lionel Messi a la awm miau avangin Ballon d’Or a dawng pha lo tih sawiin, chuti chung pawhin award sem inkhawm kal a thulh ve lo niin a sawi a, finalist a ni ve hrim hrim pawh kha hlim tur a nih thu a hrilh thu leh chu thu bawk chu Rodri hnenah pawh a sawi tih a tarlang tel.
Guardiola chuan, “Chanchinbumite thlan a ni a, mi bikte thlanchhuahte vote ni loin khawvel pumpui hrutchhuak vote tlingkhawm a ni a, ram khat ngawkin an thlan a nih miau loh avangin ngaihdan tam tak a awm a, chu chuan football hmai a timawk kan ti maw? Hnai lo e!” a ti.
Guardiola hian Vinicius pawh kha award dawn phu a nih thu tarlang telin, best manager chawimawina dawngtu Madrid boss Carlo Ancelotti a lawmpui thu a sawilang tel.