Ballond d’Or 2023 thlir zauna

Football-a chawimawina ngaihhlut hlawh ber Ballond chu October 30, 2023 – Thawhtan zanah semchhuah a ni a. A vawi riat nan Lionel Messi-a’n a dawn thu pawh kan rawn tichhuak tawh nghe nghe. Ballon d’Or 2023-a ram hrang hrangin vote an thlak dan kimchang chu tunhnai khan tihchhuah a ni ta a. Tun tumah hian Ballon d’Or 2023 thlir zauna kan nei ang.
France Football Magazine buatsaih Ballon d’Or dawng tur hi Fifa ranking-a 100 na ni phak chin ram atanga journalist thlanchhuah ten an thlan a ni a. Kum 2023 bikah hian ram 92 ten chhan eng emaw vangin vote an thlak a, ram pariatin vote an thlak lo. Journalist mi 92 te hian Ballon d’Or thei tura chhawpchhuah mi 30 atangin mi panga zel an thlangchhuak a. An thlanchhuahte hi tha an tih dan indawtin an ziak thin. Pakhatnaa an thlanin point 6 an hmu a, pahnihna in point 4, Pathumna in point 3, palina in point 2, pangana in point 1 an hmu a. Point belhkhawma point hmu sang berin Ballon d’Or an dawng thin.
Ballon d’Or 2023 thlanna bikah vote tla 92 atangin Lionel Messi-a’n pakhatna dinhmun 65-ah a luah a. A hnuai chiaha awm Erling Haaland-an pakhatna dinhmun 21-ah a luah a. Mi pangain tha bera Kylian Mbappe an thlan laiin, mi pakhatin Bernardo Silva a thlang ve thung. Lionel Messi point hmuh zawng zawng hi point 462 a ni a, Erling Haaland point hmuh belhkhawm chu point 357 a ni ve thung a. Messi leh Haaland in thlauhna hi point 105 a ni. Haaland hnuai chiaha awm Mbappe a point hmuh zawng zawng chu point 270 a ni a. Haaland leh Mbappe hi point 105 bawkin an inthlau ve leh. Portugal aiawhin pakhatnaa a thlan Bernardo Silva point hmuh belhkhawm chu point 20 a ni a, top ten zingah pakuana a ni.
Ram 65 aiawhin pakhatnaa an thlan Lionel Messi hi ram paruk; Cameroon, Cape Verde, Guinea, Jordan, Switzerland leh El Salvador te chuan Ballon d’Or dawngtu a an duh panga zingah an telh miah lo teh tlat thung.
Ballon d’Or thlanna buatsaihtu France Football Magazine aiawha vote thlaktu Vincent Garcia chuan Ballond d’Or dawng tura rinkai zual zinga tel Kylian Mbappe chu pakhatnaah a thlang lo teh tlat a, Garcia hian Mbappe aiin Haaland a dah sang zawk a. An ram player pawimawh Mbappe hi pahnihnaah thlangin, pathumnaah Messi a thlang. An ram aiawha vote thlaktu berin pakhatnaa a thlang lo teh tlat hi Mbappe hian engtin tak ngai ang maw?
Ballon d’Or 2023 dawng tur hian Messi, Haaland leh Mbappe te hi rinkai zual an ni a. Argentina aiawha vote thlaktu Enrique chuan Messi a dah hmasa ber a. Mipanga zingah an ram mi pali a ziak a, pathumnaah Mbappe a ziak. Enrique hian Mbappe aiin Julian Alvarez a dah chungnung zawk. Haaland-a te ram Norway aiawha vote thlaktu pawhin an ram mi Haaland a ziak hmasa ber a, pahnihnaah Messi a ziak tho thung a, ani hi chu a fair thawkhat viau a ngaih a ni. Mak ve mai mai pakhat chu Cristiano Ronaldo te ram Portugal aiawha vote thlaktu Joaqium Rita chuan Messi, Haaland leh Mbappe te aiin Bernardo Silva a dah chungnung teh tlat thung. Brazil aiawha vote thlak Cleber Machado chuan Messi, Haaland, Mbappe, Luka Modric, Rodri te a indawtin a ziak a, ani pawh hi fim viau a ngaih a ni.
Ballon d’Or 2023 thlannaah hian India aiawhin Hindustan Times-a sport ziaktu Dhimam Sakar chuan vote a thlak a. Sakar hian Messi, Haaland leh Mbappe te a tlar a, a duhthlanna hi khawvelin a pumpui viau niin a ngaih theih. Sarkar hian a hnampui duhsak tur a neih loh vang a ni thei a. Sunil Chhetri hming lang ve ta se a ziak hmasa ve tho mai thei. An hnampui duhsak tur neite chu an neutral thei tak tak bik lo niin a lang.