Bana Kaih Scheme leh Viksit Bharat 2047
Commonwealth Parliamentary Association Conference kharna inkhawm, Mizoram Assembly Session hall-a Inrinnia neih hmanpuitu chief minister Lalduhoma chuan, Bana Kaih Scheme hmanga Viksit Bharat 2047 tihlawhtling tura Mizoramin hma lak a tum dan tarlang in, he scheme hlawhtlin theih nan hian DoNER leh NEC te thawhpuina Mizoramin a mamawh, tiin a sawi a.
Hei bakah hian, kum 2047-a developed country-a India ram hlan kai tumna ‘Viksit Bharat 2047’ kal zelah, Mizoram chu nasa taka beitu a nihzia, Sustainable Development Goals (SDGs) Index atangin a lang, tih chief minister chuan sawiin, kum 2023-24 SDG index, NITI Aayog-in a tihchhuahah Mizoramin 72 a score-a, India rama a titha pawl a ni. Hmabak kan la neihte kan bawhzui zung zung theih nan sawrkar laipui tanpuina tam zawk kan mamawh, tiin a sawi bawk a ni.
Kan hriat angin, UN chuan a member-te tan, kum 2030-a hlenchhuah hman tur Sustainable Development Goals 17 (No Poverty; Zero Hunger; Good Health; Quality Education; Gender Equality; Clean Water and Sanitation; Affordable and Clean Energy etc…) a ruahman a. He SDGs Index-ah hian India dinhmun chu tunah hian 71-na a ni a, a kum telin hma a sawn chho ve zel na a, hmabak erawh a la ko hle a, 2030-ah hi chuan SDGs 17 zinga 50% pawh hi a hlenchhuak pha lo mai ang tih hlauhawm tak a ni.
Viksit Bharat 2047 atana SDGs dungzuia tehkhawng a duan pawh hi, hlenchhuak tur chuan tun atanga mawngvawmba anga a chet chhoh char char a ngai a. Chumi hmalakna hnuaiah chuan Mizoram hi a thleng sang pawl kan ni a, India-in kum za a tlinna tur kum 23 lo la kal leh turah hian, tuna Bana Kaih Scheme hi urhsun taka kalpui theih a nih chuan kan hmabak hi a êng dawn hle niin a lang. Mihring tlem tê kan ni a, tum tak tak chuan kum 23 chhung hi chuan India ram state zinga development chak berah kan inhlankai theih a beiseiawm hle a ni. Chutih rual erawh chuan, goal tinzawn rana kan kal loh va, sawrkarna chelh veleha flagship programme hlamchhiaha election oriented-a kan kal tan leh mai chuan, khawi ram mah hi kan thleng leh dawn chuang lo a ni.