Bana Kaihin a tum ber chu thalaite rilrua taimakna tuh – K Sapdanga

On Dec 4, 2024 19 0

Bana Kaihin a tum ber chu
thalaite rilrua taimakna tuh
– K Sapdanga
Handholding-in a tum ber leh a ngaihpawimawh ber chu thalaite rilrua taimakna tuh a ni tih Home minister K Sapdanga chuan a sawi a. Bana kai turin ban lo phar ve a ngai tih a sawi.
Thawhlehnia Kolasib-a State Handloom Expo buatsaih a hawnnaah Home minister chuan public sector undertaking (PSU) chu sawrkar hmasa lamin beidawn pui deuh tawh mah se, ZPM sawrkar chuan chhawr tangkai theih beiseiin an tuainung thar a, chu’ng zingah chuan ZOHANDCO pawh a tel a, PSU chu sum thawkchhuaktu aiin mihring intodelh tir theia midang tanpui tur a ni tih a sawi.
“Tunhnaiah sawrkarin hna hrang hrang a la a, Group ‘D’ hna lakah MA leh BA degree neite pawh dil an awm. Hei hian a entir chu, hlawhtlinna hi zirnaah a awm ber bik loa, taimakna leh rinawmnaah a awm a ni. Office-ah tu emaw hnuaia thawk tura inhawr tuau tuau loin, kan kut leh ke kan thluak hmanga intodelh tura min kaihhruaitu atan ZOHANDCO a awm reng a ni,” a ti.
Handholding-in a tum ber leh a ngaihpawimawh ber chu thalaite rilrua taimakna tuh a, mahni kut hmanga ei tur thawhchhuah inzirtir a ni tih K Sapdanga hian a sawi a. Bana Kaih policy pawh bana kai tur chuan ban lo phar ve a ngai a, chuti lo chuan kaihna tur sawrkarin a hre dawn lo, tiin a sawi bawk.
He Mela hi sawrkar laipui Ministry of Textile Development hnuaia National Handloom Development Program bultuma neih a ni a, December 3-11 thleng awh tur a ni. Mizo kutchhuak puan leh inthuamna lam chi hrang hrang pho chhuah a ni.