Bana kaitu tur ten a scheme zirho
Mizoram Agricultural Marketing Board bultumin Mizoram district hrang hranga District Agricultural Marketing Committee tan ‘Bana Kaih Scheme 2024’ chungchang inhrilhchian leh inrawnkhawm neih a ni a. Horticulture minister Prof. Lalnilawma leh Agriculture & Farmers Welfare minister PC Vanlalruata ten an telpui.
Horticulture minister chuan an department-in Mizoram district hrang hranga sawhthing hmun neitute harsatna phuhruk nan ‘Operation Ginger’ hlawhtling taka kalpuiin, zaa 70.45 hlawhtlinna hmuh a ni tih a sawi. Theihna leh thiamna nei Mizo thalaite khaichhuahna tur, Bana Kaih Scheme tihlawhtling ngei turin kalkhawmte a chah a, phurrita ngai loin, ram hmasawnna tura mawhphurhna pawimawh taka ngai turin a chah.
Agriculture & Farmers Welfare minister chuan ‘Bana Kaih scheme’ chu loneituten an sum hmuh tur hresaa hma an lak theihna tura duan a ni, tiin, an hnathawh rah dik tak an seng theihna tura ruahman a ni tih a sawi. Kuthnathawktuten eizawnna ngelnghet an neih theihna tur leh lo hmun nghet an neih theihna turin ruahmanna siam a ni tih a sawi bawk.
Adviser to chief minister (Bana Kaih scheme) Dr. KC Lalmalsawmzauva chuan bana kaih scheme portal kaltlangin progress partner ni tura dilna 1003 a lut tawh tih a sawi a. Hma lak an tumna senso chu cheng vaibelchhe 182.11 a tling tawh a. Heng dilna zingah hian Commerce & Industries department hnuaia dilna 425, Animal Husbandry & Veterinary department hnuaia dilna 304 a lut tawh tih a sawi a ni. ‘Bana kaih scheme’ chu kuthnathawktute leh a dawrtute inkarah inrintawkna siam leh leilung hausakna tichhe lo zawnga hmalakna kalpui tura duan a ni tih a sawi.
Planning & Programme Implementation secretary Lalmalsawma Pachuau chuan ‘Bana kaih scheme 2024’ kalpui dan tur a sawifiah a. Mizoramin hmasawnna tluantling leh ngelnghet, ‘Sustainable Development Goals’ a neih theih nana ruahman a ni tih a sawi a ni.
Inrawnkhawmnaah hian district tina bawrhsap emaw an aiawh emaw, Bana Kaih scheme kalpui hmasa tur sawrkar department-a district officer-te an tel a ni.