Bangla chei kha speaker niloin department ruahman anga tih – ZPM Thalai

Speaker leh minister-te bangla thawmthat leh bungrua lei chu a luahtute tih vang niloin PWD leh Assembly Secretariat lam ruahmana tih a ni tih ZPM Thalai chuan an sawi.
ZPM Thalai Hqrs. hruaitute sawi danin, tunlaia speaker leh deputy speaker personal assistant chungchanga thu thehdarh chu a dik tawk lo tih an sawi a. Bangla thawmthat leh mamawh bungrua lei chu department official-ten an endik hnu ah tul an tih dana hma an lakna a ni zawk a. Tu pawhin bangla hi luah se, thawmthat hi a ngaih miau avangin luahtu awm loh lai, a ruah remchan laiin an lo ti tawh zawk tih an sawi a ni.
Speaker bangla bikah, tuna speaker luh hma hian bangla-ah khum, dining table, chair, refrigerator leh bungraw nepnawi tlem bak a awm lo niin ZPM Thalai hian an sawi. “PWD-in furnishing atan cheng nuai 15 an sanction atangin bungraw hraw zual – khum, sofa set, almirah, fridge adt. a ruahman a. Legislative Assembly Secretariat atangin nuai 11.90 sengin inchhung bungrua leh khawsakna hmanrua lei chawp a ni. Heng bungrua hi list fel tak siam a ni a, speaker aiawh leh department official-ten joint inspection neiin hming an ziak dun vek a. Bangla office bungrua/ hmanrua atan nuai 2.29 sen a ni bawk,” an ti.
Bangla luahluh dawna a lo ruak huai leh sawrkar suma lei hmuh tur a awm leh mang lo thin chu a fel lo, tiin, speaker leh Legislative Assembly Secretariat official thukhawm chuan hetiang hi a thlen tawh lohna turin speaker/ minister-ten bangla an chhuahsan leh huna household item-te an mimal ta leh sawrkar ta hriathran hleihtheih a nih thin loh avangin engmah kenglut lo mai se, tia thutlukna siam a ni tih an sawi a. Inventory list hmang hian speaker-in bangla a chhuahsan leh hunah pawh bungrua hi a dinhmun enhoa inhlan chhawn leh vek tura ruahman a ni tih an sawi.
Speaker tana lirthei thar lei chungchangah, office a luah tirh atangin official lam chuan lirthei lei tul tihna leh rawtna an thlen na a, speaker hian a hnial thin a. Mah se, leader of the opposition (cabinet rank) lirthei kawl a chiangkuan tak loh avangin a thar lak a ngai a, sawrkarin lirthei thar lei loh hram tur a tih avangin thla 4 chhung chu lirthei hlui vek hman niin, VIP motor a indaih loh takah chuan a thar lak a ngai a. Kalphungah order of preference-in speaker chu 1st priority pek niin, lirthei lak thar chu a chang ta tih ZPM Thalai hian an sawi a. A ni kawl lai chu leader of the opposition-ah a tawlh thla ta thung tih an sawi a ni.