P&E-in eng chhit man tihsan rawt lo

P&E-in eng chhit man tihsan rawt lo
Power & Electricity department-in kum 2026- 2027 atana eng chhit man (electricity tariff) a rawtna chungchangah Mizoram Electricity Regulatory Commission (MZERC) chuan Zirtawpni khan Aizawlah public hearing a nei.
MZERC chairperson Er Benjamin L Tlumte kaihhruaia public hearing neihah hian hun bituk chhunga mipuiin rawtna leh sawiselna thu an thlen leh P&E department-in an chhanna ngaihthlak a ni.
P&E department rawtna angin kum kal mek 2025- 2026 leh kum hmasa 2024- 2025 ah eng chhit man hi tihsan a lo ni tawh loa, tuna rawtna an thehluhah pawh hian eng chhit man tihsan rawtna a awm loa, mipui atanga revenue mamawh zat (ARR) a hmuh tlin lohna chu sawrkarin subsidy-in a peksak dawn a ni. MZERC chuan ngun taka a zirchian hnu ah, sawrkar kumthar 2026- 2027 atana sawrkar pek tur subsidy leh eng chhit man tur zat hi a bithliah dawn a ni.
Multi-Year Tariff Regulations 2014 phut angin, P&E department hian kum tin mipui hnena power supply a pekna kawnga inenkawlna atana sum a mamawh (Aggregate Revenue Requirement) leh, eng chhit man bithliah chungchanga rawtna a neih hi Commission hnenah a thehlut thin a. A rawtna hi nitin chanchinbuah chhuahin mipui vantlang (consumers leh stakeholders) tan sawiselna /thurawn pekna hun hawn thin a ni. Sawiselna emaw thurawn emaw pe duh chuan MZERC hnenah ziakin (affidavit hmangin) an thehlut thin a ni.