Bangladesh-ah Sipai tha chakna hmang

Thawhlehni kalta atanga ni thum awh tur ram pum huap bungraw thiar velna dan chah Bangladesh-a opposition party lian ber Bangladesh National Party (BNP) te huaihawt chuan nasa takin ram chhungah nghawng a nei a, mihring thi leh hliam awm tawhin boruak sosang zel tur ven nan Bangladesh sorkar chuan sipai thahnem tak te, police leh dan lam hre mite ruaiin zankhua-in venhimna hna thawk turin an duty a ni. Border Guard Bangladesh (BGB) chuan ram pumah venhimna hna thawk tura an inzar pharh thu leh sipai za tam takte chu an khawpui Dhaka ah duty-in an vah kual reng thu an sawi a ni. “Mamawh ang zat a tam sipai ram chhung hmun tinah dan leh thupek kengkawh tur te, ram chhunga kawngpui pawimawh venghim turtein kan intir chhuak,” tiin sipai thupuangtuin a sawi a ni. Hetih lai hian dan bawhchhetute dotu tur bik atana rawih Rapid Action Battallion (RAB)-te chuan an ni pawh che chhuak thei reng tura an inpeih thu leh khawpui pawimawh zual bikah te chuan an inrin reng thu an sawi ve bawk a ni.
Home Minister Asaduzzman Khan Kamal chuan Thawhtanni tlai khan dan leh thupek kenkawh chungchanga hmalak dan te thlirin committee a ko a, police, dan lam kengkawhtute leh venhimna lam kaihhnawiha thawktu dangte nen meeting an nei a ni. “Dan leh thupek kengkawhtu leh enthlithlaitu (intelligence) hotu lu ber ber te te chu opposition ten darkar 72 chhung ram chhunga bungraw thiar velna dan chah an tum chhung chu an hna pangngai thawh hun chhung bak pawh rawng taka che leh tharum thawhna thlengte lo thlithlai reng turin chah an ni,” tiin thuneitute chuan an sawi. Thawhtanni zan khan misual tu tih hriat loh ten Dhaka khawpui bul lawka khawpui pahnih Chattogram leh Gazipur lawng chawlhna hmunah Bus dinglai pahnih chu halin thenawmte tan buaina nasa tak an siam a ni. Thi leh hliam report engmah an awm thu hriat a ni lo a, police leh kang thelh pawlte chuan rang takin a hmun thleng mah se, Bus te erawh a kang chhe hneh hman hle a ni.
Opposition Party ten buaina (blockade) an siam chhan hi Gazipur industrial district-a thawmhnaw siamna-a hnathawktu ten an hlawh tihsan phutin bungraw tihchhiat kawngah te mawi lo takin an che a, hei hi police ten hria-in police te nen an inbeihna lamah mi pahnih-in nunna an chan phah a, politics thila hmasawnna kawnga inpuhmawh theihna thil tak a nih avangin opposition te hian hmanrua-ah an hmang ta a ni. Home leh labour ministries-a thuneitute chuan politics thila inpuhmawhna a kal zel loh nan leh hnathawktute harsatna ber chinfel a nih theih nan pawl thum te inbiak remna hmanga buaina chinfel a nih tur thu an sawi a ni. He buaina chhuah avang hian rorel lai pakhat leh opposition party pakhat ve ve ten nun an chan a, pakhat chu Dhaka ah niin pakhat chu hmar chhak Lalmonirhat hmunah a ni.