Bangladesh atanga raltlan naupangte’n sikul nuam ti

Mizoram sorkarin raltlan naupangte sikul a kaltir a,
an awmna hmun theuhvah sikul hi kal tura tih an ni. Bangladesh atanga Mizorama lut raltlante luhka ber Parva III-ah pawh raltlan naupangte hian sikul an kal a, nuam an ti viau a ni awm e.
Govt Primary School, Parva III-ah raltlan naupang 57 an in-admit tawh a, mahse panga vel chu raltlante awmna hmun dangah chhungkuaa an pem avangin an chhuak leh. Khawtual naupang aiin he sikulah hian an tam a, zirlai 75 vel zinga 52 vel chu raltlan an ni.
An headmaster Lalbuka chuan raltlan naupangte hian sikul nuam an ti tih a sawi a, khawtual naupangte’n an en hrang lo a, an inkawmngeih tih a sawi bawk.
Raltlan naupangte hian an thiamthei pangngai tih pawh a sawi a, a pawl sang deuh pawl 3 leh pawl 4-ah phei chuan rilru nei rual te an lo ni tawh a, zirnaa thahnemngai, taima tak tak an awm tih te a sawi.
Raltlan naupangte hian khaw dang mi-ah an inngai lo niin a sawi a, sikul nuam an tih thu sawiin, mid day meal pawh an dawn thu leh sikul kal an chak chhan pakhat a nih thu a sawi.
Chaw an chhum a, dailuah, bekangsa (neutrela) leh alu an kanpawlhin an sem thin. Khawtual naupangte ang bawkin raltlan naupangte’n hei hi tui an ti a, chhuna chaw ei hi nuam an tiin sikul nuam an tih phah tih te a sawi.
Bangladesh-a Chittagong Hill Tracts-a Zo hnahthlak, Mizorama raltlante hian an khuaah Bengali tawngin lehkha an zir a, Mizorama sikul an kal hnuah A AW B leh A B C an zir tha leh. Primary school-ah hian a pawl sangah phei chuan khawtual mite’n an lo thiam vek tawh a, mahse khawtual naupangte nen pawl khatah thuho mah se raltlan naupangte hi zirtir an ngai; pindan hranah dahin zirtirtute’n A AW B leh A B C hi an zirtir thin a, an headmaster chuan raltlan naupangte hian A AW B leh A B C hi an thiam chak tih a sawi.
“An thiam chak khawp mai. A pawl sangah phei chuan an kumin a lo tlin tawh bawk a, an thiam chak khawp mai. Kan rin aiin an thiam chak,” a ti.
Zirtirtute’n zanah zirlai an tlawh kual thin a, raltlan naupangte hian tha deuhvin lehkha an lo zir thin tih a sawi bawk.