Bangladesh atangin raltlan lut

June 16 khan Bangladesh atangin an sahimna zawnga Lawngtlai district a lut, chhungkaw 9, member 29 an awm belh.
Bangladesh Chittagong Hill Tracts-a tlangmiten thuneihna sang zawk an ngiat vanga hmalakna kal mekah Bawm hnam thahnem tak Lawngtlai district-ah sahimna zawngin an lut tawh a, tun tuma lut hi puitling 16, naupang 13, an vaiin 29 an ni. Vathuampuiah lutin, khawtlangin a theih ang anga lo dawngsawngin, Refugee Camp No.2 a dah an ni. Tunah hian Vathuampuiah hian Bangladesh atanga raltlan 390 an awm mek a, raltlante hi sawrkar, khawtlang, tlawmngai pawl, kohhran leh mimal inpete tanpuina hmanga enkawl an ni.
Heti hian tunah Lawngtlai district-ah Bangladesh atanga raltlan 1901 an awm mek a, Myanmar atanga raltlan 5922 nen an vaiin raltan 7823 Lawngtlai District ah an awm mek.
Tun tum amite tel lo hian, state Home department chhinchhiah danin Myanmar leh Bangladesh atanga raltlan bakah Manipur atanga sahimna zawng Mizoramah mi 44749 an awm mek.