Bangladesh Chakma laka chetna vangin CYCA-in India sawrkar pun

Bangladesh-a Chittagong Hill Tracts-a awm Chakma-te chu Bangladesh sawrkar sipai hriatpuiin tihduhdah leh neksawr an ni mek tih Central Young Chakma Association chuan an sawi a. India Prime minister bakah khawvel huapa mihring dikna chanvo humhim lam hna thawktute chu hma laksak turin an ngen.
Mizorama hmunpui nei Central Young Chakma Association (YCA) hian thuchhuah an siam bakah Pathianni khan Chawngte-ah kawngzawh an huaihawt a. Bangladesh-a sawrkar lai paihthlak hnu ah sawrkar lailawk enkawl tura ruat, nobel prize dawngtu Dr Muhammad Yunus kaihhruai chuan Bangladesh sipai kuta thuneihna a pek angin Chittagong Hill Tracts (CHT) a awm leilung fate chu dan loa awm tumtute neksawr an ni mek tih a sawi a. An in leh lo hal leh tih chhiat niin, ramhnuaia tlanchhiat ngai khawpin an siam tih an sawi a ni.
He thil thleng hi Bangladesh sawrkarin enpui a, a tul anga hma la turin Bangladesh sawrkar an phut tih CYCA hian an sawi a. Hemi atan hian India sawrkar leh khawvel pawl huap bakah mihring dikna chanvo humhimtu pawlte chu hma la turin an ngen tih an sawi bawk.
Pathianni khan Central YCA huaihawtin Chawngte-ah Chittagong Hill Tracts, Bangladesh-a hnam tlem zawk (minority) te tihbuaina nasat vanga nunna hial chan a nih bakah chenna in 100 chuang leh Buddhist temple-te halsak duhlohna kawngzawh huaihawt a ni tih thu dawn a ni.
All Chakma NGO chuan India Prime minister hnenah SDO (Civil) Chawngte kaltlangin memorundum an thehlut a. Chittagong Hill Tracts Bangladesh-ah September 19 khan Bangladesh army puihna leh hmuhlaiin Chakma 9 kahhlum an ni a, thahnem takin hliam an tuar tih an sawi. Chenna in 100 chuang leh Buddhist temple hal a ni a, mi tam tak ramhnuaiah tlanchhia in, tun thlenga awmna chin hriat loh an awm tih an sawi a ni.
‘Bangladesh-a thil thleng mek leh rawng taka Chakma mipui nghaisaknaah hian India Prime minister hnenah India sawrkar chu inrawlh turin kan ngen a ni, tiin, memorundum-ah hian an ngenna point 6 an tarlang a ni.