Bangladesh FM-in India tlawh, NSA-in zanriah kilpui

Bangladesh FM-in India tlawh, NSA-in zanriah kilpui
Indian National Security Adviser (NSA) Ajit Doval-a chuan Thawhlehni tlai khan Bangladeshi Foreign Minister Khalilur Rahman-a chu New Delhi a thlen hnuah zanriah kilpuiin a kawm a. Hei hi Tarique Rahman-a sorkarin India nena inzawmna thar siam tura a hmalakna pakhat, inrintawnna leh duh inang tlang siam a tumna zinga mi nia ngaih a ni.
Rahman-a hi an ramin UN-a palai hlun tak a ni a, Muhammad Yunus-a kaihhruai sorkar lailawkah khan NSA a ni a, February thlaa Bangladesh Nationalist Party (BNP)-in inthlanpuia hnehna an chan hnua India tlawh hmasa ber minister a ni a. A tawiawmtu zingah prime minister foreign affairs adviser leh Prime Minister Tarique Rahman-a hnungzuitu zinga pawimawh ber pawl, Humayun Kabir-a a tel.
Doval-a hian tun hnaiah Bangladesh nena an inzawmnaah siam thar leh tumna phenah hmun pawimawh tak a chang a. Rahman-a nena an inkawm hi sorkar lailawk a din chhunga ram pahnih inkara inmil lohna a awm hnua boruak siam that leh theihna hun remchang a nih thu thil hrechiangtute chuan an sawi.
Doval-a leh Rahman-a inkawm hi darkar khat vel a ni a, NSA-in zanriah kilpui chungchangah hian sorkarin eng thuchhuah mah a siam rih lo thung.
Rahman-a zuitu, Kabir-a hi tuna an prime minister, Rahman-a hi kum 17 chhung zet UK-a a tlanchhiat lai atanga inzawm tawh niin India-a rorel lai, BJP-a foreign affairs cell member-te a kawm dawn nia sawi a ni.
Bangladesh foreign ministry chuan Thawhlehni khan thuchhuah siamin Dhaka chuan Rahman-a’n Doval-a leh External Affairs Minister S Jaishankar te telin mi pawimawhte a kawm tih an tar lang a, ‘zahawmna, inrintawnna leh inzahtawnna leh duhthusam inanga innghat ram pahnihte inlaichinna nghet leh tihhmasawn chhunzawm zel’ chu a ngaih pawimawh tur thu an sawi.
Thuchhuah chuan Rahman-a’n India a tlawh hian ram pahnihte thawhhona chu rahbi thar leh nghet zawka kalpui theihna tur lungphum pawimawh tak a siam theih a beisei thu tar lan a ni.
Rahman-a hian Nilaini khan Commerce Minister Piyush Goyal leh Petroleum Minister Hardeep Puri te a kawm bawk niin Indian external affairs ministry chuan a tar lang a. Puri-a hnenah hian Dhaka-in Asia khawthlanga buaina avanga an ramin energy-a harsatna a tawh mek a hmachhawnnaa puia New Delhi-a tuialhthei a thawn thin bak a dang, a bikin diesel thawn a dil a ni.
Rahman-a hian India atanga visa hmuh harsatna tihziaawmna, a bikin khualzin leh sumdawngte tana tihziaawmna te, Bangladesh-in ram pawna thil thawn chhuahna tur India leh lawng chawlhna hmuna luh theihna tur siam that te pawh a tel.
Rahman-a’n Delhi a tlawh hma hian Indian High Commissioner Pranay Verma-a chuan Thawhtanni khan Dhaka-ah Prime Minister Rahman a hmu a, ram pahnihte inzawmna chungchang an sawipui a. India-in Bangladesh sorkar leh mipuite nena thawhhona tha neih a tum thu a sawi.
Tun hnai thla eng emaw zat chhungin India hian BNP hruaitute a dawr thin a, December thlaa premier hlui, Khaleda Zia-i vuinaah Jaishankar-a’n India ai a awh a, February-a Lok Sabha Speaker Om Birla-a chu sorkar thar lak luhnaah a tel bawk.
Tar lan tawh thin angin India leh a thenawm hi August, 2024-a mipui lungawi lohna lantirin Prime Minister Sheikh Hasina-i an paih thlaka India-a a tlanchhia hnuah an inkar a tha lo hle a. Rahman-a kaihhruai sorkar a din hmaa sorkar lailawk khan Awami League hruaitu hi thawn haw turin Delhi hnenah ngen mah se chhanna mumal pek an ni lo.