Bangladesh hmalakna avangin Tripura-ah ramri endik

Bangladesh hmalakna avangin Tripura-ah ramri endik
India nena an inrina lui, Mahuri kamah Bangladesh sorkarin hma thar an la nia sawi a awm avang leh India lama nghawng a nei thei dawn nia hriat a nih avangin Pathianni khan Tripura sorkara mi pawimawhten ramria Belonia khua leh thenawm ram hmalakna an en fiah.
Tripura Public Works Department Secretary Kiran Gitte-a kaihhruai team hian India-Bangladesh ramri chhehvel fangin khaw mite leh mipui thlan chhuah, Belonia Municipal Council chairman-te an kawm.
Gitte-a chuan South Tripura district khawpui, Belonia, a bulhnai khua leh mi hring chenna bakah lui kamte humhalh dan tur an ruahman a, hma pawh lak nghal tur niin hna tan nghal a ni dawn tih a hnuah a sawi.
“June thlaah hian thil siam that ngai leh a kaihhnawih dang chu kan zo vek dawn a. Chhun zan zawmin hna hi thawh a ni ang a. South Tripura district-ah hian hna a tam em avangin engineer panga dah belh tura tih nghal a ni,” a ti.
August, 2024-a tui lian leh lei min nasa tak a thlen hnuah khan India-Bangladesh ramria thil ding leh a dang tam tak a chhia a. Sorkar chuan district dang dang nen hmun 43-ah hetiang thil chhia hi a awm nia an hriat thu IAS officer chuan a sawi.
Ramria thil chhiate siam that hna hi tan nghal a ni ang a, Border Security Force (BSF) officer lawkte pawhin an thutchilh dawn tih a sawi.
Bangladesh sorkar hian Belonia khaw ep, Southern Tripura hrulah hian tun hnaiah hian hmunhma an din thar nasa a, hei hian Indian cheng tam tak tihlauthawngin fura ruah a tlak tam hunah tui lianin an khua a tihbuai zual phah an hlau.
Belonia Municipal Council huang chhunga cheng leh Ballamukh, Ishan Chandranagar leh South Tripura district-a khaw eng emaw zat chuan Bangladesh sorkarin hmunhma hrawl tak tak a din mek chu an dinhmun tihim lo theitu a ni dawn niin an sawi hlawm a ni.
A hmain lui kamah hian Bangladesh sorkar chuan Tripura hmar lam, Unakoti district-ah hmunhma an lo din tawh bawk a. Kailashahar leh ramri khua eng emaw zat chu tui lian laka derthawngin a lo awm phah tawh bawk.