Bangladesh hotupa thusawi dan vangin KMMTTP ngaipawimawh – Zoramthanga

Bangladesh hotupa thusawi dan
vangin KMMTTP ngaipawimawh
– Zoramthanga
Tunhnaia Bangladesh sawrkar lailawk hotupa in China nen an tanrual chuan India hmarchhak an awp thei mai dawn ni awma a sawi chungchangah MNF president Zoramthanga chuan, he thu a rik avang hian India sawrkarin Kaladan Multi- Modal Transit Transport Project Road chu a ngaipawimawh thar hle a, chumi atan chuan MNF bawk an pawimawh tih a sawi.
Inrinni khan MNF president hian Lawngtlai district-a KMMTTP Road, Zorinpui leh Myanmar ram chhung engemaw chena thui a tlawh a, kawng dinhmun hi a enfiah. MLA Er R Rohmingliana’n a tawiawm a ni.
Bangladesh hotupa Mohammad Yunus thusawi avang leh khawvel inher zelin a ken tel avangin KMMTTP chu tunhma aiin a let tam takin India-in a ngaipawimawh tawh a. He kawng hi Mizo mipui tan malsawmna nasa zawk thlentu a nih thuai a beisei tih a sawi.
“Bangladesh sawrkar a inthlak a, Muslim firfiakin ro an rel mek. Mohammed Yusuf hi China atanga a zin haw in India hmarchhak state 7-te India nen an inzawmna awmchhun chu Siliguri-a km.20 vel lek a ni a; tuipuia inkalpawhna North East-in a dang a nei lo, tiin, China leh Bangladesh tangkawpin hma an la dawn tiin a sawi a. He thu hian India a ti meng phar awrh a. Hei hian Akyab chhun tura tih Kaladan Multi-Modal Road pawimawhna a lo lang ta chiah a ni. Helam kawng hi a tlang chak a ngai tih India sawrkar hian a hrechiang ta hle a, Zoram leh KMTTP Road hi NE leh India lakah a pawimawh ta em em a ni,” chief minister hlui Zoramthanga hian a ti a. He thil lokal mekah hian MNF bawk a pawimawh tih India-in a hria a. Pathianin a hun takah MNF chu a tungding leh dawn niin a sawi.
Kaladan Multi-Modal Road a hlawhtlin thuai theihnan theihtawp chhuah a tum tih sawiin, “Myanmar leh Bangladesh a buai poh leh hnam thuthlung neitu MNF chu chawisanin a awm zel a ni,” a ti.