Bangladesh-in tuialhthei tam zawk leitir turin India ngen

Bangladesh-in tuialhthei tam zawk leitir turin India ngen
Bangladesh chuan India atanga tuialhthei a lei thin zan tihpun a tum a, an ram sorkar thara minister-in a thenawm ram a tlawh hmasak berna atan Foreign Minister Khalilur Rahman-a’n New Delhi a tlawh mekah hei hi thlenin ram pahnihte inlaichinna tha lo tak ni hman chu a ziaawm tan tih a lannaa ngaih a ni.
Ni hnih a zin chhung hian Rahman-a hian Indian External Affairs Minister S. Jaishankar leh Petroleum & Natural Gas Minister Hardeep Singh Puri te a bia a, energy-a an thawhhona chungchang pawh a sawipui.
Rahman-a chuan tun hnaia India-in diesel thawn avangin lawmthu a sawi a, tuialhthei leh lei tha tam zawk a dil a, Puri-a chuan a ngenna hi ‘peih sa leh a tak thlen rinawm’ a nih thuin a chhang tih Bangladeshi ⁠foreign ministry chuan thuchhuah siamin a tar lang.
Bangladesh hi energy a lak luhah a innghat nasa hle a, a innghahna hi US-Israel leh Iran indona avang hian a buai phah hle.
Minister tlawhna hi Prime Minister Tarique Rahman-a sorkarin ram dang a tlawh hmasak ber a ni a, February thla khan inthlanpuia hnehna a chan hnuah a ram hruai hna a chelh tan a ni.
Ram pahnih hruaitute inkawmnaah hian intlawh tawn khuahkhirhna tihziaawmna tur leh venhimna lama thawhhona tihchak dan tur sawiho a ni bawk a. India chuan Bangladesh mite tana visa pek dan tur — a bik takin damdawi lam leh sumdawnna atana hman tur — chu kar tharah awlsam zawka kalpui tura tih a nih tur thu a sawi niin thuchhuah chuan a tar lang.
Nunphung leh eibara inzawmna thuk tak nei, ramri km 4,000-a thui intawh ram pahnih hi Bangladesh prime minister hlui, Sheikh Hasina-i kum 2024-a mipuiin an paih thlaka New Delhi-a a tlanchhiat atang khan an inkara inlaichinna a chhe zui hle.
Dhaka chuan Bangladesh-a International Crimes Tribunal-in hremna a pek, Hasina-i hi thawn kir leh turin a ngen thar leh niin thuchhuah chuan a tar lang bawk.
Rahman-a hian Indian National Security Adviser Ajit Doval-a a hmu bawk a, inbiaknaah hian ram pahnih leh an chhehvel bakah khawvel huap thil an sawi a. Kawng hrang hranga thawhhona tihpun dan an ngaihtuah bawk.
Ram pahnih inkar hi Hasina-i chungchang vak bakah Bangladesh-a Hindu-te beih an nih avangin a chhe zual a. An pahnih hnihin visa inpek an titawp a, India hian Bangladesh atanga bungraw thenkhat ⁠chu lawng chawlhnaa an luh khapna a siam a. Tun hnaiah erawh an inkar hi a ziaawm leh tawh tih hriat a ni.
Indian Foreign Minister Jaishankar-a chuan December thla khan Tarique ⁠Rahman-a nu, prime minister hlui, Khaleda Zia vuina hun hmanpui turin Bangladesh a tlawh a, Indian Prime Minister Narendra Modi-a chu inthlanpuia hnehna a chan tum khan a lawmpui hmasa berte zingah a tel bawk.