Bangladesh chu a buai tak meuh meuh. South Asian rama mihring maktaduai 170 vel chennaah hian kawtthlera lungawilohna lantir chu thil thar a ni lo; mahse, tuna lungawilohna lantir erawh hriattheih china rapthlak ber a la ni tia sawi a ni.
Tharumthawhna avangin nunna chan 100 chuang an awm tawh a, kar kalta Zirtawpni bikah khan nunna chan 50 chuang an awm hial a ni.
Sorkar chuan la tih ngai loh communication chhut chah nasa taka kalpuiin internet te titawpin phone service te a khuahkhirh bawk.
University campus a peaceful protest a bultan chu tunah chuan ram pum huapa lungawilohna lantirnaah a chhuak ta a ni.
Zirlai sang tam tak te university zirlaite chuan sorkar hnaa quota system tihtawp ngiatin lungawilohna an lantir a.
Bangladesh-ah hian sorkar hna hmun thuma thena hmun khat lawih chu Pakistan laka independence suala kum 1971-a indona kalpuia tel veterans te chhungte tana hauh a ni a. Zirlai te chuan chu system chu duh lovin sorkar hnalak chu merit-based a kalpui an ngiat a ni.
Zirlai pawl lungawilohna lantirtute chuan police te leh sorkar lai mek Awami League student wing Bangladesh Chhatra League te chuan zirlai lungawilote lakah tharum uchuak an hman avangin lungawilohna leh thinrimna nasa zawk a chhuah phah tiin an sawi a. Sorkar chuan he puhna hi an hnawl thung.
“Tunah chuan zirlai te chauh an ni tawh lo, lungawilohna kalpui hi mi tin ten an thlawp tawh niin a lang” tiin Dr Samina Luthfa, University of Dhaka a assistant professor of sociology chuan a sawi.
Bangladesh hi khawvel huap pawha economy thangduang berte zinga mi a ni a, mahse, mithiamte chuan a hmasawnna chu university graduates te tana hna tautet siam nana chhuah a ni lo an ti.
Bangladeshi thalai 18 million te chu hnazawng mek anga ngaih an ni a, university graduate te chuan an kum upat rual lehkhathiam lo zawkte aiin hna an van zawk tih a ni.
Bangladesh hi thuamhnaw siamna hmunpui a ni tawh a, global market ah kum khatah thuamhnaw $40 billion vel thawnchhuak anga ngaih a ni.
He sector-ah hian mi maktaduai li vel hna thawka awm anga chhut niin chuta hnathawk tam ber chu hmeichhia an ni a, mahse, factory job chu generation thar thalaite hna zawn a ni si lo a ni.
Prime Minister Sheikh Hasina-i’n kum 15 rorelna a kalpui chhungin Bangladesh chu a inthlakdanglam nasa hle. Kawngpui thar sial niin, lei tam tak dawh niin factory tam tak din a ni a, capital Dhaka ah pawh metro rail te pawh tlantir a ni tawh.
Tun hnai kum sawm chhungin a per-capita pawh a let thumin a pung a, World Bank chuan tun hnai kum 20 chhungin Bangladesh chuan rethei bakberh ata mi maktaduai 25 a khaichhuak a ti.
Mahse sawiseltute chuan Bangladesh hmasawnna chu Hasina kaihhruai Awami League party thlawptute chauhin an hlawkpui an ti ve thung.
Dr Lufhta chuan, “Eirukna a hluar hle a. A bik takin ruling party te nena inzawmna neiah a turu zual a. Eirukna chu hremna lekkawh si lovin nasa taka kalpui mek a ni” tiin a sawi.
Tun hnaiah Bangladesh a social media-ah te Hasina top official tena eirukna nasa tak an kalpui sawina a nasa hle a, chung zingah chuan army chief hlui te, police chief hlui te, senior tax officer leh state recruitment officials te pawh tarlanin an awm.
Kar kalta khan Hasina chuan eirukna thilah hremna an lekkawh dawn tiin a sawi a. Dhaka a press conference a neihah household assistant peron in $34 million lawih a chheprelh avangin hremna an lekkawh thu a sawi a. A mihring hming sawi a nei lo va, Bangladeshi media te chuan chutiang khawpa tam sum chu sorkar contract lobbying, corruption leh thamna atang baka neih theih a ni lo an tihsak.
Bangladesh anti-corruption commission chuan police chief hlui Benazir Ahmed, Hasina nena inhnimhnai tak in dan kalha dollar million tel a neih avangin chhuichianna an kalpui mek bawk a.
Chutiang chanchinthar chu Bangladeshi nawlpuite tan thil thar a ni lo, cost of living sang zelah a tuartu an ni thung. Eirukna nasa taka a hluar karah right activist tam tak te chuan democratic activity chu tun hnai kum 15 chhungin a tlahniam nasa an ti bawk.
“A zawn zatin tum thum inthlanpui hmachhawn tawhah inthlanna felfai leh thianghlim kalpui a ni tawh lo” tiin Meenakshi Ganguly, South sia director, Human Rights Watch chuan a sawi a. “Hasina hian mipui nawlpui tena an duh hruaitu thlangtura democratic basic rights an neih chhuhsak an nih avanga an lawmlohna hi a namnul a ni” tiin a sawi.
Opposition party lian ber Bangladesh Nationalist Party (BNP) te chuan kum 2014 leh 2024 inthlanoui pawh Hasina hnuaiah chuan inthlanna felfai leh thianghlim a awm dawn lo tiin an lo boycott tawh bawk a.
Right group te chuan tun hnai kum 15 chhungin sorkar sawiseltu langsar mi 80 chuang te chu an khuangcherbo hmak tiin an sawi a, an chhungte pawhin an awmna an hre lo an ti bawk.
Sorkar chuan lungawilohna hmetmitin media pawh a khuahkhirh zel a, Sheikh Hasina chu a autocratic tial tial bawk tia sawi a ni bawk.
“Sorkar leh ruling party laka lungawilohna hi hunrei tak ata inmung tawh a ni” tia sawiin Dr Lufhta chuan, “Mipui ten an lungawilohna an lanchhuahtir ta mek a, lungawilohna chu mipui ten duhthlan tur chuang an nei tawh lo nia an inhriat hnua an kalpui thin a ni,” tiin a sawi.
Bangladesh sorkar laka lungawilohna nasa
Get real time updates directly on you device, subscribe now.
Prev Post
Next Post