Banna pawm loh chungin kar khat office tawh lo

Aizawl West I bialtu TBC Lalvenchhunga’n adviser to chief minister (finance) a nihna atanga banna a thehluh hnuah office a la kai lo a, a awm zel dan tur hriat a ni rih lo.
A banna hi chief minister-in a pawm lo a, November ni 17 khan banna hi a thehlut. A tukah chief minister-in a pawm loh thu a sawi a, mahse TBC-a hian office a la kal lo.
A banna pawm a nih loh avangin office hi kalin a hna a chhunzawm dawn em tih te, a bang tlang dawn em tih te hriat a ni lo a, party lam chuan bang lo turin an duh.
November ni 20-ah ZPM PAC (Political Affairs Committee) an thu a, hetah hian TBC-a banna chungchang hi an ngaihtuah. He thutkhawmah hian amah TBC-ah pawh a tel a, thil awmzia te pawh sawitir a ni.
Chumi hnuah PAC hian TBC-a hnenah hian lamkal tirin, bang lo turin an ngen tawh bawk a, mahse chumi hnuah pawh office hi a kai chuang lo. PAC aiawh hian mi pahnih an kal.
Thu dawn danin, TBC-a hian a hma daihin adviser to chief minister a nihna atanga ban a tum thu hi a lo sawi tawh a, PAC-ah pawh banna a thehluh hma thla khat velah khan a lo sawi tawh. Dampa bial bye election zawha ban a tum thu hi a sawi tawh a, a bial chhunga party hruaitute pawh a hrilh lawk tih thu dawn a ni. Chief minister hnenah pawh ban a tum thu hi a sawi lawk a, banna a thehluh hma hian party chhungah chuan an hre lawk thup.
Kar khat chuang office a kal tawh lo a, Val Upa Council-in an kawm ve leh dawn tih thu dawn a ni.