Barca boss thar tur inrinsiakna vung chho nghal
Season kal lai tawp ruala Barcelona manager a nihna chawlhsan ve tawh tur Xavi Hernandez-a hmunruak luahtu tur inrinsiakna a alh chho nghal hluai a, coach langsar Jose Mourinho, Luis Enrique leh Michel-te hming a richhuak nghal.
Kum 2021 atanga Catalan team enkawl tan Xavi kalsan tur hmun hi Europe-a club hmunruak lianber turte zinga pakhat ni nghalin, season tawpa Liverpool chhuahsan tum ve bawk Jurgen Klopp-a hmunruak nen hian tun nipui thawt laia titi lian a ni dawn.
German coach-in a chhuah tur thu a sawi laia Reds dinhmun hi chu a la tha rih a, Barca boss thar tur erawh chuan sum harsatna bawhbeh reng karah team dinthar hna hautak a hmachhawn a ngai dawn niin a lang!
Table-a palina luah pha chauh Barcelona hian tun dinhmunah point 11 zetin hmahruaitu Girona an thlau tawh a, leiba sang takin a bawm reng avangin player thar lei kawngah pawh harsatna an la tawk kal mek a ni.
Pathianni khan social media lamah Arsenal manager tang lai Mikel Arteta chu Barca boss thar ni thei tura sawirik a ni a, Spanish website pakhat chuan Spaniard hi Barca shortlist-a hmun sang ber luahtu a nih thu leh kumin nipui thawt ruala north London club a chhuahsan tur thu an tarlang.
He mi chungchanga amah kawmtu media mite hmaah Arteta chuan a chungchanga thu lengvak chu dawt muhlum a nih thu sawiin, “Tu maw? Kei hi maw? Ni lo e. Fake news a ni. Ka awmna tur hmun leh ka kawppui tur mihring diktakte kiangah ka awm mek a, boruak kal vel pawh a dik thlap e,” tiin Nou Camp club nena an sawizawmna a pha hul.
Barcelona boss thar ni thei tura ngaihte thlirkual teh ang.
Antonio Conte
Hlawhtling taka Juventus, Inter Milan leh Chelsea lo enkawl tawh kum 54 mi Italian Conte hi free agent a ni mek a; Tottenham-ah khan beisei angin a hlawhtling ta tlat lo a, nikum March thla atang khan hna vawn nei loin a la awm a, tunhma lamin sum lama thlapwna tha tak nen hlawhtling takin hna a lo thawk tawh thin pawh a ni mai thei a, sum harsatnain a kiansan hleih theih rih loh Barcelona-ah hian lut ta se eng boruak nge a tawnbuak ang tih hi zawhna awm thei a ni.
Roberto de Zerbi
Brighton boss Roberto de Zerbi hi Liverpool nen pawha sawizawm ni mekin, Premier League manager zinga Xavi hmunruak luah thei tura vauchher lian ber a ni bawk.
Kum 44 mi Italian hian England-a a tactic vawrhchhuah daihzai tak avangin fak a hlawh kal mek a, nikum khan Brighton mai mai pawh table-ah parukna kaipuiin, an club chanchina a vawikhatna atan a club enkawl chu Europe-ah tournament a khelhpui pha bawk.
Luis Enrique
Kum 53 mi Spain boss hlui hian tunah Paris St-Germain enkawl mekin, national team manager a nih lai khan Euro 2020 semi-final a thlenpui a, 2022 World Cup last-16 stage-a Morocco anngam loh hnu khan a post kalsanin club lam a pan ta a ni.
Club level-a manager nihna zawna a hlawhtlin ber chu Barcelona boss a nih lai kum 2014 leh 2017 inkar kha niin, Champions League trophy a chawipui bakah La Liga title pahnih leh Copa del Rey pathum bakah Super Cup, Club World Cup leh Spanish Super Cup trophy pakhat diat diat a lakpui bawk.
Marcelo Gallardo
Kum 48-a upa Argentine hian an ram club lar River Plate kaltlangin hming a chher tan a; chu hmuna hna a thawh lai chuan Premier League player langsar ni thei turin Enzo Fernandez leh Julian Alvarez a chher hman a, December 2022 khan a chhuahsan.
Mi tamtakin Europe khawmualpui lama manager hna hraw chin a chelh chhoh mai theih an beiseipui laiin nikum November thla khan Al-Ittihad manager nihna a pawm ta zawk a ni.
Rafael Marquez
Mexico international hlui hi tunah kum 44 mi chauh la ni mah se chhung lam leh pawn lam atanga Barcelona hrechiangtute zingah a tel a, a chhan pawh Barca first team tana match 150 chuang a khelh tlin hnuah an B team a enkawl zui leh ngat a ni.
Khatih laia a hrual engngemawzat khan tunah first team an zawm tawh a, Xavi hmunruak luah thei tura Marquez hming lam rik a ni tel hi a mak lo ang.
Top level managerial experience a la ngah tawk loh erawh an iai chhan tur a ni mai thei.
Michel
He Spaniard la upa lo tak hnuaia Girona thanduan dan hian mak tih a hlawh rei ta fu a, a enkawlna hnuaiah he Spanish club tenau hian tun season kal laiah European football story a luah kal zel a, La Iga table-a an hnuaia awm ngar ngar Catalan team nena sawi-zawm a ni hi thil inhmeh lo a ni lo ang.
He Spaniard coach hriat hlawh lo tak hnuaiah Girona chuan La Liga an kai chho a, top flight-a an season khatnaah table hmahruaitu a nihpui thei.
Chumi hmain Rayo Vallecano pawh top division hruai thleng tawhin, Huesca a lo enkawl tawh bawk.
Jose Mourinho
AS Roma-in an petchhuah hnua hna vawn la nei leh ta rih lo Mourinho hi a history-ah Real Madrid nena lo inzawm tawh a ni a, kum 2010-2013 chhunga Bernabeu office pui a lo thutchilh tawh avang hian iai a hlawh deuh mai thei a, mahse, chu chuan pawisa thaptute rinluh tel a thulh phah lo!
Catalan hmelma lian ber a enkawl hma kum 1996-2000 chhung khan Sir Bobby Robson leh Louis van Gaal-te hnuaiah Por-tuguese hian Barcelona-ah hian tawnglettu hna te, coach puihna dangte a lo thawk ve tawh tho a, Barca mi leh sa ti pawhin a sawi ve theih tho ang.
Kum 60-a upa Maourinho hian kum 2012 daih tawh khan Real boss a nih hma lawk, Inter Milan a enkawl laiin Champions League beiseina an thlah hnu lawkah Barcelona manager ni thei ngai dawn loa a inhriat thu a lo sawi tawh a ni.
Real Madrid leh Barcelona manager ni ve ve thei hi mi pahnih chiah an la awm a, chu’ng mite chu Enrique Fernandez leh Radomir Antic niin, Mourinho hi a pathumna a ni thei dawn em kan thlir ang.
Thiago Motta
Barcelona midfielder hlui Brazilian Motta pawhi hi kum 41 mi lek la ni mah se lamrik zingah tel phain, a chhan pawh season kal laiah hian a team enkawl lai Bologna chu Serie A kaltlanga Europe hmun chang pha turin a fight pui pha tlat a ni.
A hmain Genoa leh Spezia lamah reilote lo thawk tawh bawk mah se managerial experience a la ngah tawk loh avang erawh chuan Nou Camp club meuh kaihruai tura rin a kai nep deuh mai thei.