Barca chakpui zana inhliam Yamal

Barca chakpui zana inhliam Yamal
Nilaini zana Barcelona-in sikhat faia an mikhual Celta Vigo an hneh hramna goal awmchhun a thun hnu lawkah hliam avangin Lamine Yamal chuan team doctor-te puihnain khelmual a chhuahsan a, manager Hansi Flick chuan thla thar maia El Clasico khelh leh tura pahnihna luahtu Real Madrid an hmachhawn hunah khelmual lut tura a dam hman a beisei thu a sawi.
Spanish rawlthar kum 18 mi hi penalty box chhungah Yoel Lago chuan titluin, a hlawhchhuah penalty hi minute 40 a herchhuah rualin Celta keeper Ionut Radu ven goal-ah a chhuihlut fel chauh a, a kaihza tha na avangin khelmualah a bawksawp nghal.
Team doctor-te puihnaa khelmual a chhuahsan hnuah a hliam dinhmun endik tur leh enkawlna dawng zui turin tunnel lama luhtlangpui nghal a ni a, a hmunruakah Roony Bardghji dahluh a ni.
Yamal-a intihnat chungchang sawiin Barcelona leh Spain midfielder Pedri chuan, “A hliam hian chawlhkar tam a awh loh hram ka beisei. Naktuk lamah test kalpui a ni dawn a, tah chuan a dinhmun dik tak kan hre thei chauh ang.
“Duhsakna ka hlan a, rilru hahdam taka a awm ka beisei. A la naupang a, ngai a rawn awh leh dawn tih hi a chiang a ni,” a ti.
Tualchhung football hmawrbawk hnaih tawh lam, boruak a tan chhoh hun lai, player pawimawhte club tana an hlut zual lai a nih piahlamah June thla Fifa World Cup khelh hun nghakchhuak turin ni 50 pawh a tling tawh lo a, star player-te tana inhliam hun lo tak mai a ni chho mek a, Fifa tournament lian khel tur national team boss-te tan pawh club lama hun la hmang mek an player pawimawhte inhliam lai hi hmuh nuam lo tak tur a ni ang!
Spotify Camp Nou chhung mipui 59,034 pungkhawm hmaa an hnehna sualchhuah hma Thawhlehni zanah title race-a an elpui awmchhun ni tawh Real Madrid chuan Alaves laka point thum hlawhchhuakin an chung chiaha hmahruaitu Barca an hnaih chho leh hret a, Nilaini zanah Calatan team hian Real nena an inkar hi point kuaah bawk an dahkir leh ta a ni.
Khelh ruk chiah awm tawhah Barcelona hian point 82 nei tling tawhin point 73 kawltu Real Madrid lakah nghet takin title race an thunun zel rih a, mahse, an thiampuipa Yamal a inhliam a, chak loh theihna pakhat Clasico an hmabak bawk a, reigning La Liga champion Barca hian an title an humhim ngei ngei dawn tih a la chiang bik rih lo!
Lamine Yamal hian season kal laiah La Liga goal 16 thun tling tawhin, assist tum 11 a siamchhuak tling tawh bawk a; Euro 2024-ah khan Young Player of the Tournament atan thlan lo ni tawhin, kumin US, Canada leh Mexico inthlentawm tur World Cup-ah pawh hian mite hmuh chak leh thawm neilian ber turte zinga mi a ni mek.
Nilaini La Liga inkhel dangah top four hniam ber luahtu Atletico Madrid an talbuai chhunzawm a, relegation pumpelh tura insangruh mek Elche mualah 3-2-a tlawmin, La Liga bika match li an chak loh zawnna a ni ta a, season thara Champions League khelh phak an tumna a derthawng zual zel!
Karliamta Inrinni Copa del Rey final penalty peta vanduai tawh bawk Altetico hian league khelh 32-a point 57 bak la pel thei lo chhunzawm zel chungin table-ah palina an la luah zel a; an hnuai chiaha rawn nawr ve rengtu Real Betis nena an inthlauhna chu point riat a ni.
Elche thung hian point 35 hum chungin table-ah 15-na an luah chho a, relegation zone-a an tlak luh lohna hi point hnihin a dal.
Real Madrid 2-1 Alaves
Thawhlehni khan Kylian Mbappe leh Vinicius Jr-te goal khat ve ve tihluh hmangin tunhnaia an tlawm fona thawhsanin Spanish giants hian hnehna boruak an tem leh thei ta a; La Liga title race-ah hmahruaitu Barcelona nena an inkar pawtzim hlek mah se a tuk zanah Catalan-ho hian an inkar point thuma phai chu an chhungkhat leh ta a ni!
Inelna hrang hrang belhkhawma match li chhung hnehna lawm thei tawh lo Real hian Santiago Bernabeu-a mipui 61,468 hmaah chak tumna sang tak nen bul tanin, a tir phat atangin inkhel an thunun a, an nawr na nghal hle a, an goal hmasa zawk hlawhchhuak tur erawh chuan darkar chanve an nghah thlen tho tho a ngai!
Minute 30-ah Mbappe chuan mualneitu team hmahruaina goal thunin, penalty area pawn atanga lei hrula French striker ball thawnluh phei kha Alaves goalkeeper Antonio Sivera tan hlauhawmin lang lo mah se a hmaa defender ding Jonny Otto chuan a lo khakper hlauh a, a lo inrin phan phanna lamah ball a kal ta lo a, a ni lo lamah a tlu!
Mbappe tan tun kha season kal laia a league goal 24 tihluh tlinna chiah niin, kha goal khat hmang khan half time-ah Real-in si khat faiin hma an hruai phawt.
Second half tir lamah Brazil winger Vinicius chuan Federico Valverde pass atangin Madrid goal hnihna leh season kal laia a league goal 12-na ni nghal a thawh ve leh.
Home team hi sihnih faia chak mai tawh tura ngaih a nih hnu hun tawp dawn last kick-ah Alaves hian zangnadawmna goal khat khung vein, an goal neihchhun ni zui ta hi striker Tony Martinez-a tihkluh a ni.
Tunhnai Champions League quarter-final stage-a Bayern Munich ngam zo ta lo Bernabeu club hi an La Liga game hnuhnung pahniha chak zo lo an ni a, tuntum chu an hmahruaina an hum tluan thei a, La Liga title race-ah beiseina chhe te an la nei zui thei!
Alvaro Arbeloa team Real beiseina hi a chau tawh angreng a, Nilaini zanah hmahruaitu Barcelona an chak leh avangin tun kum zabi kal meka trophy la loa season an hman tluan vawi ngana a hnai zel!
Tun century kal meka Real Madrid trophyless season kan thlirliam tawhte chu 2004-05, 2005-06, 2009-10 leh 2020-21 a ni.
Arbeloa hma lam hun hi a chiang lo tawh hle niin an sawi a, petchhuah pumpelhna kawng awmchhun chu Catalan-ho hmakhalha La Liga title lak chauh ni tawhin an sawi a, chu lah thil awlsam a ni dawn lo!
Season kal laia El Clasico vawi hnihna turah May thla hian Nou Camp-ah Real an lut dawn a, Hansi Flick-a team hmahruaina chhuh turin he inkhel liana hnehna chan hi Arbeloa leh a naute tan tihmakmawh a ni khawp ang!
Zaninah Real Madrid hian Real Betis an hmachhawn zui leh dawn a; Inrinniah Alaves-in Mallorca an tum thung dawn a ni.