Barca ropui ni a hnai zel!

Thawhlehni zanah sikhat faia an mikhual Osasuna hnehin, hemi zan vek inkhel dangah an elpui lian ber leh title race-a an tana hlauhawmn pha awmchhun ni tawh Real Madrid an tlawm thung a, Barcelona chuan La Liga table-a an hma-hruaina sawhnghet leh sauhin, kum 2018-19 hnu lama a vawikhatna atan Spanish champion nih an hnaih belh sauh.
Nou Camp-a goal awmchhun leh sikhat faia Barcelona chakna goal awmchhun hi a lut tlai hle a, mualneitu team-in ankawtkaiah point hnih an hloh then mai dawn emaw tih hnu hun tawp hma minute nga chiah awm tawhah substitute Jordi Alba chuan chakna goal a thun a; he hnehna an sualchhuah leh nen Xavi team hian league khelh nga chiah awm tawhah point 14-in anmahni hnaihbertu Real Madrid an kalsan tawh a, May ni 14-a an hma-chhawn leh tur Espanyol an hneh chuan Barca hian kum 2019 hnu lama a vawi-khatna atan La Liga title an hlawhchhuak chiang tawh ang.
Table laihawl luahtu Osasuna hian minute 27-na lekah Pedri laka ‘pro-fessional foul’ avangin an player pawimawh pakhat Jorge Herrando an hloh a, kha kha La Liga season kal laia Osasuna-in red card vawi sarih an chawina chiah a ni.
Hun tam zawk player 10-in khel mah se mikhual team inthlungtha lutuk kha champion-elect team pawhin tih vak ngaihna an hre lo hlen dawn niin a lang hman thuak a, Alba goal an dang zo ta ngang lo mai pawh a!
Herrando hnawh-chhuah a nih hma atang khan, dan pangngai angin, Barcelona hian inkhel an thunun leh a, Inrinni Seville khaw Copa del Rey final-a Real Madrid tum tur an nih hre rengin Barcelona lakah an game hnuhnungbera luh hmasak chang pakua ngawt an thlak a, chuti chung leh a tlem zawk ni rei hle chungin mualneitu team tlarhma an dang tluanchhuak zo tep a ni!
Pedri, Ronald Araujo leh substitute Ousmane Dembele-te’n Barca tana an hun tha neih bawhpelh fai vekin, Raphinha pawh-in free-kick atangin a thun tep a, Frenkie de Jong leh Ansu Fati goal tur pawh mikhual goal-veng Aitor Fernandez chuan tha zet zetin a dansak bawk.
Rim taka goal venhim hna thawk chunga goal thun theihna hun remchang melh ve pah reng Osasuna tan Lucas Torro leh Iker Munoz-te’n an hun tha hmuh an hlawhtlinpui zo bik lo.
Xavi chuan rawlthar kum 15 mi lek Lamine Yamal chu bench-ah lut thut thei turin a chhawp-chhuak a, mahse, he winger hian luhna hun remchang a hmu ta lo.