Barcelona champion lohna chu betebawk!

Barcelona champion lohna chu betebawk!
Inrinni zanah 2-1 mualneitu Osasuna hneh lehin league khelh 34-a point 88 nen Barcelona chuan Spanish La Liga title an kawl lai humhim turin point hnih chiah an mamawh ta!
An hnuai chiaha pahnihna luahtu Real Madrid chuan nizan result tarlan hman loh inkhel pakhatah Espanyol an luhkhung a, an chak chuan Catalan team nena an inthlauhna chu a ngai point 10-ah bawk an dahkir leh ang a, Bernabeu club hian point an hloh then a nih vaih chuan match dang nghah buai ngai tawh loin
Hansi Flick-a team hi champion-a puan an ni tawh dawn a, he thu buatsaih lai hi chuan an la champion hman lo deuh!
Nizanah Real an chak a nih thung chuan Barcelona tan league title nghah leh det a ngai dawn a, May ni 10 El Clasico-a Real Madrid an mikhual hunah tlawm an pumpelh hrim hrim chuan an title kawl lai an humhim thei tawh dawn a ni.
Inrinnia Estadio El Sadar inkhel kha Barca tan pawh a awlsam bik lo a, goal awm lo first halkf a zawh hnu second half minute 81-ah substitute Marcus Rashford-a cross atangin striker Robert Lewandowski chuan mikhual team hmahruaina goal a tilut thei hram.
Minute nga a kal leh tihah midfielder Fermin Lopez chuan Osasuna defence pelin Ferran Torres tan a chhawpsak ve thung a, goalkeeper Sergio Herrera chuan a vawi hnihna atan Barca goal a chhuah leh.
Osasuna beilet tan tuibur hmuam da pawh tling loah Abel Bretones-a cross pui tak hmangin Raul Garcia chuan mualneitu team goal neihchhun tilut ve bauh a, an si khat la phurh erawh an sut zo hman ta lo.
Barcelona tan tun kha league game 10 chhung an chak zawnna chiah a ni ta.
Pamplona, Spain-a hnehna an chan leh hram hnuah Nou Camp club hian league khelh li chauh awm tawhah champion rim an nam vung vung tawh a, inkhelh banah goal khat thawhtu Torres chuan an dinhmun sawiin, “Real Madrid lakah pressure kan han dah belh leh chu a ni a, naktuk hian an chak zawh loh chuan kan champion fel tawh ang.
“Vawiina kan inkhel hi La Liga away fixture kan khelh tawha la hautak berte zinga mi a ni. A khirhzia ngaihtuah chuan point thum chauh hlawhchhuah kha chu a tlem mah mah a ni. Kan khel tha ve thlawt e,” a ti.
Home team tlarhma pawh an tlan hneng hneng bik lo a, Barca goalkeeper Joan Garcia tan fiahna hrawl fu fu an thawnlut ve chamchi a; minute 45-ah phei kha chuan Ante Budimir khan hnai set sawt atangin goal ban a chhuihper dawp a, an vanneih zan ni se Osasuna khan hma hruai daih thei an ni ve tlat!