Barcelona comeback a pui

Barcelona comeback a pui
An khelmual chei thar hnua hming thar Spotify Camp Nou tih ni taah Inrinni khan an inrin hmain Catalan hoin si an chhuah a, an thah fel awrh tihah Alaves midfielder Pablo Ibanez chuan Victor Parada siamsak atangin home supporter rual phut zawkna turin hmahruaina goal a khung a; he mi hnua Barcelona erlet hian goal thumin an siphurh an chhanglet a; an kawtkaia 3-1 hnehna nen Spanish La Liga table-ah Real Madrid pawtthlain hma an hruaikir leh phawt.
Tun kha Spanish top flight-a Ibanez-a vawi 100 inlanna chiah niin, a mellung phun zanah Barca laka Alaves hmahruaina goal a khung.
Barcelona hian si erawh an phur rei duh ta bik lo a, minute riat an khelh tlin rualin Lamine Yamal chuan Robert Lewandowski ball chhawpsak atangin mualneitu team siphurh sutna goal a khung a; darkar chanve khelh tlin dawna Dani Olmo goal khat thawh ve leh nen home team hian half time-ah 2-1-in hma an hruailet.
Second half hun pekbelh minute thumna a kal mek laiin Spain forward Olmo chuan Alaves goalkeeper Antonio Sivera dan zawh loh goal khung lehin, Barca goal thumna leh he match-a a goal hnihna a ni zui ta a; he goal hi Raphinha siamsak a ni.
He result hmang hian Hansi Flick-a team chuan khelh 14 atanga point 34 hmuin La Liga table-ah hma an hruai leh ta a; an lehpelh leh tak phawt Real Madrid chuan game 13-ah point 32 an hmu a, nizan result tarlan hman lohah Girona an hmachhawn a, an chak chuan an hmahruaina an neikir leh ang.
Barca hian La Liga game an khelh hnuhnung vawi 3-ah goal an thun kim vek a, chute zat match-a an goal khung belhkhawm chu 91 zet a tling nghe nghe.
Tuna an dinhmun mek hi February 2019 daih tawha Ernesto Valverde hnuaia goal an khung tluan rei (37 matches, 99 goals) hnu lama hetih kawnga an record tha ber a ni.
Naktuk zan league match-ah Barcelona hian Atletico Madrid an mikhual chhunzawm leh nghal ang.
Inrinni Nou Camp inkhel kha a hmunah mipui 44,834-in an thlir.