Barcelona leh Inter Milan an inhnehtawk (Barcelona in ball an chang, Inter Milan in goal an thun)

Nilai zan khan UEFA champions League semi-final hnuhnung zawk khelh a ni a, inkhel hmuhnawm takah mualneitu FC Barcelona leh an mikhual Inter Milan te 3-3 in an inhnehtawk. Minute 90 chhungin Barcelona in ball an chang deuh char char a, Inter Milan in an chance neih chhunah goal an thun ve zel thung.
Estadi Olímpic Lluís Companys-ah La Liga hmahruaitu Barcelona hmachhawn tura lenglut Inter Milan in duhthusam a thain bul an tan. Inkhel tan atanga second 30-na lekah Denzel Dumfries cross tha tak chu Marcus Thuram chuan fing leh fuh zetin a kheng goal a, hma zet maiah hmahruaina goal a thun. Hma takah goal an thun vangin Serie A champion Inter Milan an phur a, inrintawkna sang zawk nen mikhual an nihna hmunah an inlan.
Hma takah Inter Milan in goal an thun hi inkhel tihmuhnawm zualtu a ni a, an si phurh sut tuma Barcelona tan khawh a hmuhnawm thei hle. Barca hian ball changin an khingpuite an kat kual char char a, nuamti takin an mualah an khel. A bikin rawlthar Lamine Yamal a hmuhnawm thei hle a, kum 17 mi Yamal hian Inter Milan tlarhnung a chhaih buai thei hle a, left-back Dimarco a chhaihbuai thei tak zet. Catalan team hian ball chang tam viau mah se goal thuntu zawk chu Inter Milan bawk an ni nawn leh. Inter tan hian goal hmahruai siamchhuaktu Denzel Dumfries chuan minute 21-naah fuh zetin a hlap goal a, an goal hnihna thunin, an hmahruaina a tizau.
An mualah ngei si hniha an hnufual vangin Barca in goal thun an tum ngawrh leh zual a, goal thun tumin tan an khawh nasa hle. An hun tha nei chhawr tangkai thei lawk lo mah se Yamal chu dan reng sen a ni lova, a hun a thleng ta nge nge. Yamal hian fuh zeta ball a lak kual hnuin far post-ah nalh zetin a pet goal a, minute 24-naah an si phurh a sut then. Inter Milan tan hian si nghak Yan Sommer rintlak viau mah se Yamal pet goal zet erawh chu a tan dan theih rual a ni lova, hmuhnawm ti lo tak chungin a thlir goal.
An si phurh an sut then vangin Barca an phur thar leh zual a, goal thun belh tumin an khingpuite an nawr na hle. Ball chang deuh chawt a, an khigpuite kat kual rengtu Barca tan hun tha a inherchhuak leh ta nge nge. Barca hian fuh zetin Inter Milan tlarhnung an thiat a, Raphinha siam tha zet mai chu Ferran Torres chuan minute 38-naah awlsam zetin a pet goal a, an si phurh a sut zo ta nge nge. Goal li a luh hnuin inkhel a hmuhnawm zui viau a, goal thun theihna hun tha nei bawk mah se goal luh belh lovin first half a tawp.
Second half ah inkhel a hmuhnawm zui viau. Chawlhlawk hma ang bawkin Barcelona in ball an chang tam a, Inter Milan in goal an thun hmasa leh tho thung. Hakan Çalhanoğlu corner chhuih tha tak chu chetha tak Denzel Dumfries chuan minute 63-naah fuh zetin a tauh goal a, hma an hruai nawn lehna goal a thun. Hma an hruai nawn leh vangin Inter Milan an phur thar leh a, ball an chang tlem zawk viau chungin an inringtawk thar leh. Inter Milan in goal an thun hmasa zel hi inkhel tihmuhnawmtu a ni a, inkhel boruak a nung tha hle reng.
Goal an chhuah nawn leh vangin Barcelona tantute an ngui a, tlawm hlauin an thaw dep dep, mah se an hlauthawng rei lova, goal pui zet kan hmu leh thuai. Corner atangin fing leh inman taka chance an insiam hnuin Raphinha chuan pui zetin a pet a, goal bar a pet per dawp. Raphinha shot tha tak, ball let leh hian vanneihthlak takin si nghak Sommer hnung zang a per a, goal ah per lutin, Barca in minute 65-na lekah an si phurh an sut nawn leh. Barca in an si phurh an sut nawn leh vangin chak tur zawk a chiang lo thar leh a, mualneitu Barca in chakna hun an nei tha zawka ngaih a ni.
Goal ruk zet a luh hnuin inkhel a hmuhnawm zui viau a, goal thun theihna hun tha nei ve ve mah se an chhawr tangkai thei tawh lo. Iner Milan in goal thun nawn leh mah se offside vangin hnawl a ni a, Barca in tlawm an pumpelh hlauh. Hun tawp dawn hnaiah Yamal a hmuhnawm leh viau a, fing zet maia a pet chu si nghak Sommer tan dan rual awm lo mah se goal bar a per hlauh thung a, Inter Milan in vanneihthlak takin tlawm an pumpelh ve bawk a. Inkhel hmuhnawm tak chu 3-3 in a tawp ta a ni.
Barcelona leh Inter Milan an inkhel tum hian kum 17 leka upa Lamine Yamal a hmuhnawm tak zet. Lionel Messi leh Cristiano Ronaldo te an uaithla lam tawh a, football ah tuin nge hmuhnawm min hmuhtir leh ang tih kan ngaihtuah a, kan inzawt thin. Chhanna pekin kan awm, amah chu Lamine Yamal a ni. Yamal hi kum 17 chauh a la ni, khelmual chhunga a puitlinzia chu veteran player ang mai a ni thung. Inter Milan laka a chetla kha mahni khaw naupang kiangah hahdam leh nuamti taka khel a, ennawm lantir ang mai a ni. Kum 17 an nih laia Lionel Messi, Cristiano Ronaldo leh Kylian Mbappe te chet dan atanga chhutin Lamine Yamal hi player ropui bik a nihzia chiang takin a hriat theih. Yamal chetla hi i chik poh leh ‘Yamal nge nge’ i tih ngun ngei a rinawm. Football a lal thar Lamine Yamal a piang a, ro rel tan ta hi i lawm lo a ni mai thei. I lawm lo a nih pawhin i hriat ve erawh a tul e!