Barcelona lehpeltu Real Madrid!

Barcelona lehpeltu Real Madrid!
Pathianni zanah 4-1-a an mikhual Real Sociedad sawp chungin Spanish giants chuan La Liga table-ah hmahruaitu Catalan-ho an lehpel a, nizan inkhel result tarlan hman lohah Barca hian Girona muala point thum an hlawhchhuah ve leh theih chuan an dinhmun ngai an luahkir leh ang.
  Santiago Bernabeu khelmuala mipui 74,176 teh meuh pungkhawm hmaah Gonzalo Garcia chuan tan atanga minute ngana lekah Trent Alexander-Arnold siamsak atangin mualneitu team hmahruaina goal a thun nghal thawt!
Malpui hliam avanga nikum December leh January thlaa inkhel thei lo England international tan tun kha thla hnih chuang chhunga starting line up a chan vawi khatna niin, khelmuala a kirleh zanah assist a nei chhunzawm leh nghal zat!
  Sociedad lam hian minute 21-ah penalty an hlawhchhuak nawlh a, Mikel Oyarzabal chuan mikhual siphurh sutin, hei hi hun puma an goal neih chhun a ni zui ta a ni.
  Barnabeu luahtute hian si an chhuah atanga minute li an khelh tlin rualin penalty an hmu ve leh a, Jon Aramburu tihtluk atanga a hlawhchhuah penalty atangin Vinicius Junior chuan Real hmahruai nawnna goal a chhuihlut ve a; he mi chinah hian home team an la lungawi teuh lo!
Darkar chanve khelh pelh hlawtah Federico Valverde chuan Alvaro Carreras chhawpsak atangin Madrid goal thumna a thawh.
  Second half tir lam minute 48-ah Brazilian Vinicius bawkin penalty atangin a goal hnihna leh he inkhela goal lut hnuhnungber ni zui ta a tilut ve leh a, season kal laia a goal 10 thun tlinna chiah a ni.
He hnehna hmang hian Real Madrid chuan league khelh 24 atangin point 34 an thawkchhuak tling a, point hnihin an lehpelh tak Nou Camp club lakah an sang a, tarlan tak angin, nizanah Barcelona an chak chuan an hum ngai an luah chhunzawm leh ang.
Real Madrid hian zanin Champions League play-offs match-ah Benfica an mikhual zui leh dawn a; kartawp Inrinni zan La Liga match-ah Real Sociedad-in Real Oviedo an tum ve thung ang.