Basketballer ropui LeBron James

Khawvela infiamna ngaihhlut hlawh zual zingah Basketball hi a tel a. Khawvela ram ropui ber USA phei chuan an atchilh leh zual. Infiamna hrang tam tak zingah chawhruala player in hlawh an neih that berna Basketball-ah player ropui bik a awm a, a hming chu LeBron James a niin, ‘King James’ tiin a hming phuah a ni hial bawk.
Basketballer ropui ber ang hiala ngaih LeBron Raymone James Sr. hi December 30, 1984 khan Akron, Ohio-ah chhungkaw harsa takah a lo piang a. A pa Anthony McClelland hian thubuai lian tak a neih vangin LeBron James hi pa nei lo ang hlauh a ni a. A pa hi a nunah a inrawlh zui ta miah lo nghe nghe. A nu Gloria Marie James enkawlna hnuaiah harsa takin nun an hmang a, rethei takin khawvel an hmachhawn. An khawsak a harsat em vangin a nu Gloria hian a fapa duat, kum 9 mi lek James chu nun tha zawk a neih theih nan chhungkaw pangngai tak Frank Walker fin a phalsak. Tualchhung football coach Frank Walker hian naupang than duang tak LeBron James hi basketball khel zawk turin a duh a, basketball-ah nun bul a tantir.
A hunawl remchangah basketball zirin, a timi zui ta viau. An khuaa St. Vincent–St. Mary High School tan khelin a khel tha thei hle. An school tan a khelh that thei em vang hian NBA club te ngaihven a hlawh ta hial a. Kum 2003 khan NBA team Cleveland Cavaliers chuan NBA draft atangin an la lut. Cleveland Cavaliers tan hian a khel tha chho hle a, kum 2004 khan NBA-ah rawlthar tha berah thlan a ni ta hial a ni.
NBA-a a club hmasa ber Cleveland Cavaliers tan hian kum 2003 – 2010 thleng a khel a. Cavaliers hi NBA-ah champion pui em lo mah se mimal takin James hi a chetha thei em em a, kum 2005 atang khan NBA All-Star-ah thlan tel a ni chho zat zat. Kum 2009 khan Most Valuable Player (MVP)ah a vawi khat nan thlan a ni. Kum 2010 khan MBA – MVP-ah thlan a ni zui leh bawk a, a zawnin chawimawina ngaihhlut hlawh tak a dawng. Kum 2012 leh 2013-ah te MVP ah thlan a ni zui leh a, hetihlai hi a ropui vanglai tak a ni.
Cleveland Cavaliers-ah ropui taka a khelh hnuin kum 2010 khan team lian zawk Miami Heat a zawm a, Heat-ah hian LeBron James a par vul leh zual. Kum 2012 leh 2013-ah Miami Heat hi NBA-ah a champion pui a. A zawna final an khelh tum hian James hi final MVP-ah thlan a ni ve ve. Vawi hnih a champion pui hnuin kum 2014 khan a club hlui Cleveland Cavaliers-ah a kir leh. Kum 2016 khan Cavalier hi NBA finals hruai thlengin a champion pui a, hemi tum hian Final MVP-ah thlan a ni leh bawk.
NBA-a a club hmasa ber Cavaliers-ah kum li hun a hma leh hnuin kum 2018 khan Los Angeles Lakers a zawm a, LA Lakers-ah hian tun thlengin a la khel. LA Lakers hi kum 2020 khan NBA Final hruai thlengin a champion pui a. He tum pawh hian Final MVP-ah thlan a ni zui leh a. NBA-ah a khelhna team a champion pui apiangin Final MVP ah thlan a ni zat zat. Hei hi LeBron James ropui em emna pakhat a ni.
LeBron James hian NBA-ah kum 21 zet hun a hman chhungin game 1,492 a khel a, point 40,474 zet thawkchhuakin, NBA player awm tawh zawng zawng zinga point thawkchhuak hnem ber a ni mek. NBA Regular season a point thawkchhuak hnem ber a nih bakah hian play-off-ah point 8,023 thawkchhuakin, point thawkchhuak hnem ber a ni tel bawk. Regular season leh play-off a point a thawhchhuah zawng zawng hi point 48,177 zet a ni. NBA-ah hian minute 67,825 khel tawhin, NBA khel hnem ber a ni.
‘King James’ hi NBA a point thawkchhuak hnem ber a nih bakah hian ball sawhlet vawi 11,185 zet a dawng tling tawh a, assist vawi 11,009 nei tawh bawkin, point, rebounds leh assist-ah sing khat chuang nei kawp vek thei hmasa ber a ni tel bawk. NBA All-Star-ah vawi 20 zet a tel tawh a, ll-Star-a tel tam ber niin player ropui Kareem Abdul-Jabbar-a record siam a khum. Heng a record hrang hrang te hian NBA-a player ropui ber a nihzia a nem nghet!
Club tan a ropui ang bawkin LeBron James hi ram tan a chetha viau bawk. Olympic-ah tum hnih USA a champion pui tawh a, silver medal vawi khat a lakpui tawh bawk. James hi player ropui Michael Jordan nen khaikhin an ni thin a, tunah chuan LeBron James hi basketballer ropui bera ngaih a ni tawh a, a ni reng tawh ang.