Bawlhhlawh bawk …

Aizawl by-pass (world bank road) kawng dung leh a bul vel lui kawrte thianfaia nimina hnatlang BKHP ITI veng unit chuan plastic bawlhhlawh ip 50 an chhar khawm a.
BKHP ITI veng unit hnatlang hi an unit bil hmalakna a ni mai lo va, Mizoram BKHP 2023 rorel bawhzuina a ni. Chumi awmzia chu Mizorama kohhran lian tak chuan chanchin tha hrila rawngbawlna piah lamah ‘bawlhhlawh thenfai’ a ngai pawimawh tlat a, kohhran ngaih pawimawh thamin kan bawlhhlawh thehthang danin a zir lo tihna a ni.
Hetiang hian kohhran leh pawl hrang hrangte bawlhhlawh thianfaia hnatlang an awm deuh reng a, englai pawhin bawlhhlawh thenfai tur thahnem tawk tak a awm reng thin. Eng vanga bawlhhlawh thianfaia hnatlang hi neih tul tlat thin nge kan tih chuan, bawlhhlawh a paihna hmun lova kan paih thin vang a ni mai a. A paihna hmuna bawlhhlawh paih turin kan inzirtir lovin kan inngen lo pawh a ni lo; hetiang lama awareness campaign bei ngawrh ber zinga ami kan ni pha hial ang; mahse, kan beng arawngah a lut lo a, bawlhhlawh paihna hmun tur siam na na na, a hmun lovah kan paih ruih ruih reng a, kan khawsak phung hi ngaihtuah chian chuan a zahthlak ngawih ngawih a ni ber.
Hei hi a tihtawp dan tur ngaihtuah si lova bawlhhlawh thianfaia hnatlan tlut tlut ringawt hian khawimah min thlen dawn lo; khawvel awm chhunga bawlhhlawh thianfai reng renga hnatlan tlut tlut ngaia awm hi Chanchintha hrila missionary tam tak tir chhuak thei tan chuan thil zahthlak tak a ni.
Tuna kan kalphung hi chu, a bulthum lam uluk si lova a ler lama thuai nghek ang a ni ber. Kan paih sauh sauh a, kan hnatlang leh mai a. A paihna hmun lova bawlhhlawh paih lo tura inhrilhin awmzia a nei lo a nih chuan, a aia khauh zawka kal dan ngaihtuah mai hi kan hmabak chu a ni tawh mai awm e