Bawlhhlawh paih lirtheite ding vek tur hi

Bawlhhlawh paih motor hman man rualkhai leh mumal siam phutin bawlhhlawh buaipuitu pawl pathum – Aizawl Garbage Vehicle Owners’ Association (AGVOA), PP Mode Bawlhhlawh Paih Welfare leh Sanitation Driver & Handyman Association(SD&HA) te chuan karleh Thawhtanni, September ni 23 atang khian din vek an tum ta a.
Pawl pathumte hian nawrhna hi huaihawt thut tur an ni bik lova, kum 2019 atang tawha thuneitute hnena an lo thlen tawh, tunhnaiah pawh hma an lak dan tur puangzar lawk chunga kalpui an ni. An thil phut chungchanga ngaihsak an hlawh that loh avangin lungawilohna lantir nan chawlhkar khat chuang flag dum an lo tar tawh bawk a. Tunah chuan ‘bawlhhlawh paih motor din vek tur’ an ti leh ta a ni.
Mihring nuai li dawn chenna khawpui ni khat bawlhhlawh tam thamzia leh, ni khat pawh bawlhhlawh paih a nih loha a buaithlak turzia hi chu kan hrethiam tlang vekin a rinawm.
Sawrkar thuneitute hian, pawl pathumten harsatna an thlen thu leh an thil phutte hi chawpchilh taka hre chawp an ni bik lova, hetiang thil a lo thlen pawha hmalak dan tur ruahman sa an neih a rinawm a. Pawl pathumte pawh hian mipui zah tak chung leh ngaipawimawh tak chungin hma an la ve thin tih chu kum 6 zet sawrkar an ngaihchan dan atang hian a hriat theih bawk awm e.
Sawrkar hian pawl pathumte tlan loh chhunga bawlhhlawh paih dan turah ruahmanna thar siam dawn ta se, a nghawng tur chu a hriatsa vek awm e. Tuna pawl pathumte aiawh tur hi midang chhawr zui dawn pawh ni se, tuna rate mumal lo tak ang hi chuan an tlan rei zui thei kher bik lovang tih a rinawm bawk.
Eng pawh ni se, mipui harsatna thleng lo tura inbiakna hi a awm thuai a ngai a. Chawp leh chilh taka beisei ang diak diaka thil a kal lo a nih pawhin pawl pathumte pawh hian ‘mipui service’ an nihna hre rengin thuneitute zai ngai thiam taka an kal a tha awm e.
Bawlhhlawh paih motor tlan dan chungchangah pawh hian, khawpui traffic tibuai lo zawnga traffic thawl laia bawlhhlawh senghawi fel dan tur hi ngaihtuah atan a tha hlein a rinawm bawk. Bawlhhlawh paihtu motor lam hian punctuality leh regularity hi tun aia tha zawk hian eng tin nge an kalpui theih ang tih te pawh hi chinfel atana duhawm ngawt mai.