Bawlhhlawh paihna truck 20 hlan
Bawlhhlawh paihna truck 20 hlan
Urban Development & Poverty Alleviation department chuan Smart City porject hnuaia sum hmangin Aizawl Municipal Corporation hnenah tawih thei bawlhhlawh paihna tur bik truck 20 a hlan a. Hemi rual hian bawlhhlawh sawngbawlna hmun Luangmuala Material Recovery Facility Centre sak turah a satu turte nen thawhdunna thuthlung ziah nghal a ni.
Aizawl Smart City Ltd. chief executive officer CC Lalchhuangkima sawi danin, Smart City hnuaia truck 20 hlan tak hi tawih thei bawlhhlawh phur thei tur bika duan, tui put chhuak theilo ‘leak proof’ vek an ni.
Material Recovery Facility Centre project atan hian NEPRA Resource Management Pvt. Ltd. Ahmedabad Gujarat leh JN Buildcon Aizawl thlan an ni a; Smart City hian funding tumin contractor-te hian a hmunhma sak leh enkawl zui hna an thawk ang. AMC-in bawlhhlawh lakkhawm a tum ve thung ang. Facility Centre awmna hi AMC ram a ni bawk.
He project hi agreement ziah atanga thla 12 chhunga zawh tur a ni a. NEPRA Resources Managenment Pvt. hian Indore, Pune, Bengaluru, Jamnagar leh Ahmedabad-ah hlawhtling takin hna an lo thawk tawh a.Aizawl tana an thawh turah hian AI technology thar ber install tel a ni dawn. Centre hi Rs. 25,17,16,180 senga sak tur niin, thla 12 chhunga zawh tur a ni. Nikhata bawlhlawh a sawngbawl theih tur zat hi tonne 75 a ni.
Heng hi AMC, UD&PA leh Smart City Ltd tangho hmalakna, Faina Hmathlir ‘Comprehensive Plan for Municipal Waste in Aizawl’ hnuaia bawhzui a ni.
Truck hlantu UD&PA minister K Sapdanga chuan Aizawl khawpui a fai loh hian AMC mawh a ni loa, a cheng mipui mawh a ni, tiin, “UD&PA, AMC leh Smart City hi mipuiin an chenna khawpui an vawnfai theihnan an inchhawpchhuak a, amaherawhchu, mipuiin an tih tur an tih ve chauhin hlawhtlinna kan hmu ang. Chhungkaw tinin bawlhhlawh thliarhran leh paih chungchangah tan la thar zel ang,” a ti
Aizawl mayor Lalrinenga Sailo chuan AMC-in bawlhhlawh a lakkhawm hian local council chak leh chak lo, veng changkang leh changkang lo a hriat hle, tiin, “Local council chak leh veng changkangah chuan tawih thei leh tawih thei lo an lo thliarfel vek thin,” a ti