Bawngkawn – Zemabawk leh Vaivakawn kawng siam tlawh

Bawngkawn to Zemabawk National Highway siamthat mek leh Vaivakawn Zohnuaia leiminna hmuna kawng siam chu Inrinni khan PWD minister Vanlalhlana’n a tlawh.
Minister chuan PWD hmalakna hnuaia kawng siam leh enkawl chu tih mai mai a theih dawn loh tih sawiin, PWD hotute chu kawng tha ni tura tehfung hrang hrang tlin ngei tura uluk taka hmalakna vil thin turin a chah. Hnathawh mek a hmuna enfiah a, contractor-te pawh an hmalakna enpui zel turin a chah bawk.
Vaivakawn leimin avanga harsatna leh hmalakna chu harsatna dang a thlen loh nan furpui thlen hma ngeia peihfel hman turin department hotute a chah.
Km.7 a thui Bawngkawn to Zemabawk National Highway siamthat hna hi M/s SLT Infracon Pvt. Ltd-in EPC mode-in a thawk a, Rs. 5,63,17,000 senna tur niin January 6 khan hna tanin kumin July 6 ralhmaa zo hman tura tih an ni. Hna zawhfel atanga kum 3 chhung a enkawl leh venhim hna an thawk chhunzawm ang.
Contractor-in a nih dan tur leh tehfung bituk hrang hrang a zawm tha em tih PWD minister hoin teh a ni a. Kawng thui lam, zau zawng leh chhah dan enfiaha zirchian a ni. Heng bakah hian kawng siam nana bituminous concrete hman lum zawng (temperature) pawh minister hmuh laia enfiah a ni.
Vaivakawn leiminna hmunah hian mamawhna avanga kawng bal thawmthat hna hmasa leh hman lailawk tur PWD-in a thawh mek enfiah niin, ruahman dan chuan karleh chhunga zawhfel hman beisei a ni. Kawng tha zawk leh tlo zawk fur ruahtui tlak hma ngeia peih hman a nih theih nana hmalak tul leh awmze nei zawka tui luankawr siam dan tur pawh sawiho a ni a. Line department dangte nena hma lak tul dan pawh sawi a ni.