Bawrhsap-in kawng dan a nih lohna tura sawrkar hmalak dan a hrilhfiah

Kolasib district bawrhsap Robert C Lalhmangaiha chuan Ningani khan Kolasib-a MJA member-te kawmin, Kolasib district-a lirthei enkawltuten kawngpui tha an phut avanga lirthei tlan an remtih loh chungchanga a hmalakna a hrilhfiah.
Bawrhsap chuan Kolasib district-a lirthei enkawltu pawl hrang hrangten a lungawi lohna an lantir thu sawiin, ‘Lirthei enkawltute hian lungawi lohna lantir an tum thu an puan ve leh, thulh tir tum turin hma an la nghal tih a sawi a. Kawng siamtute kokhawmin kawng chhe zualpui hnawh tura hriattir an ni tih a sawi. State PWD (Highway Division) chuan he thutkhawm bawhzui hian kawng khuar chhe zual lai an hnawh tan nghal a. NHIDCL pawhin an hnuaia contractor-te chu ni 15 chhung huntiam pe in, kawng chhe zual lai hnawh mam turin an hriattir tih a sawi a ni.
An district-a lirthei enkawltute pawh a thutkhawm pui a. District administration leh kawng siamtutue hmalakna hrilhfiah an ni a, lirthei tlantir lo tura hma an lakna chu kaltlangpui lo tura ngen an ni tih a sawi bawk.
Amaherawhchu lirthei enkawltuten an hmalakna kaltlangpui an tum avangin district magistrate a nihna angin dan leh thupek kenkawh ngaihna thil duhawm lo thleng lo se tih chu a duh dan a ni tih a sawi. Hei bakah hian mipui tan harsatna thlen lo se an duh tih sawiin, hei hi sawrkar thuneitute din chhan leh an ngaihtuah ber tur a ni tih a sawi a. District administration-a a thawhpuite chuan kawng siam hna thawktuten chak taka an thawh theihnan hma a lakpui tur thu leh an vil zui tur thu a sawi a ni.
He hunah hian MJA Kolasib hi an president Andrew Vanlalauva hoin an kal a. Bawrhsap hi SP David H Lalthangliana leh district thuneitu dangten an tawiawm a. MJA member-te nen hian kawng tha nei tura chak zawka hmalak ho dan turte an sawi a ni.