Bawrhsap-in raltlan camp tlawh

District Level Committee on Myanmar and Bangladesh Refugees Champhai chairman, bawrhsap James Lalrinchhana chuan Thawhlehni khan Khuangleng khaw lua raltlante awmna hmun, refugee camp a tlawh.
Camp-a Khuangleng Village Level Committee on Myanmar and Bangladesh Refugees ruahmannaa an tana chenna leh nitin mamawh phuhruk a nih dan a enfiah a. Raltlan khuahkhirh leh chhawmdawl kawngah Village Level Committee chu District Level Committee thuchhuah leh sawrkarin inkaihhruaina a siamte tha taka kengkawh turin a chah. Raltlante pawh ram dan leh sawrkar thuchhuah tha taka zawm tura chahin, khawtlang hmalakna tha taka thlawpa tawiawm zel turin a chah a ni.
Khuanglengah hian Myanmar atanga raltlan mi 84 vel an awm mek a; an zinga 64 hi refugee camp-ah awmin a dang 20 hi khawchhungah in luahin an khawsa a ni.