Bayer Leverkusen in trophy nen bul an tan

Inrinni zan khan 2024 German Super Cup khelh a ni a, inkhel hmuhnawm takah Bayer Leverkusen chuan penalty shoot-out ah Stuttgart an hneh a, trophy nen season tharah bul an tan.
BayArena, Leverkusen-a inkhelah team hnihte an inhnehtawk viau a, hun pangngaiah goal hnih ve ve an thun. German Bundesliga champion Leverkusen hi chawlhlawk hmain kim lo zawkah an tang a, tlem zawk an nih bakah si an phurh bawk vangin an tlawm teuh hle. Hun pangngaiah tlawm an pumpelh hram a, penalty shoot-out ah an chak zui leh bawk vangin Leverkusen hian German tualchhunga inelna hrang hrangah khelh 51 chhung zet tlawm an nei lo.
Leverkusen hian an mikhual Stuttgart lakah bul an tan tha viau a, Victor Boniface chuan minute 11-na lekah hmahruaina goal a thun. He goal hian Stuttgart a chhaihkawlh ta tlat thung. Stuttgart hian na takin an khingpuite an nawr let nghal a, minute 15-na lekah Enzo Millot chuan goal thunin an si phurh a sut. Goal khat ve ve an thun hnuin an inhnehtawk zui viau a, goal thun tumin an innawr tawn nasa hle. Minute 37-naah Martin Terrier hnawhchhuah a nih vangin Leverkusen dinhmun a chhe hman hle.
Chawlhlawk hmain goal luh belh lo mah se chawlhlawk hnu lamah Stuttgart in bul an tan tha a, goal thun hmasa zawkah an tang. Minute 63-naah Deniz Undav chuan Stuttgart hma hruai letna goal a thun. An si phurh hi Leverkusen in an set thei lo reng a, an mualah an tlawm mai a rinawm hman. Leverkusen tan Patrik Schick chuan minute 88-naah an si phurh sutna goal hlu tak a thun a, Stuttgart lakah tlawm an pumpelh.
Hun pangngaiah 2-2 an inhnehtawk hnuin penalty shoot-out ah Bayer Leverkusen hian 4-3 in hnehna an chang a, an club chanchina trophy panga an lak tlinna hun an tawng. Beyer Leverkusen leh Stuttgart te hi German Super Cup-ah vawi hnih an intumna a ni a, an intum hmasak zawk kum 1992-ah Stuggart an chak a, 2024-ah erawh Leverkusen an chak ve ta thung.