Bundesliga champion Bayern Munich chuan Borussia Monchen-gladbach atangin Switzerland goal-keeper Yann Sommer an chhuhsak a, a man hi official-a tarlan ni lo mah se media lam chuan euro maktaduai 9.5 (£8.3m) niin an tarlang.
-- Advertisement --
Switzerland international Sommer hi tunah kum 34 mi lai ni ve tawhin, ram tan game 80 a khel tling tawh a; Bayern nen hian July 2025 thleng daih tur inremna an ziak fel.
Thlasik insuan hun laia Munich club-in Sommer lam an hawi chhan hi nikum December thlaa vultleng (skiing)-na lama a keruh titliak number one keeper Manuel Neuer theih loh vang a ni a, Neuer hi tun season-ah a inlan thei tawh dawn lo a ni.
Chona thar avanga a phur thu sawi hlut Sommer-a Gladbach contract kha kumin nipui thawt laia tawp tawh tur a ni ve reng reng a, Manchester United nen thuk taka sawizawm an nih hnuah he Swiss goalkeeper hian a khawsakna ngai Germany bawka insawhngheh a thlang ta zawk a ni.
Nikum August thlaa sikhat ve ve thuna Gladbach leh Bayern inhnehtawk tum khan Sommer hian Bundesliga record thar siamin match khatah save vawi 19 a nei!
Nikum Qatar ram World Cup-ah khan Switzerland tan khelin, a team chu last 16 lamah Portugal-in 6-1 tehrengin an petchhuak a nih kha!