Bayern lakah Barca an nui ve ta

Nilai zana UEFA Champions League khelhah FC Barcelona chuan an kawng daltu lian tak ni thin Bayern Munich chu 4-1 in an hneh. Barcelona an chak lai hian La Liga club lian Atletico Madrid erawh chu an mikhual Lille hneh lovin an mualpho ve thung.
La Liga hmahruaitu Barcelona hian an mikhual Bayern Munich lakah bul an tan tha hle a, inkhel tan atanga minute khatna lekah season thara chetha tak Raphinha chuan hmahruaina goal a thun. Hma takah goal an thun vangin phur viau mah se Barca an phur rei lova, goal an chhuah ve thuai. England captain Harry Kane chuan minute 18-naah goal thunin an si phurh a sut.
Bayern goal thun hian Barca a chhaih kawlh a, chawlhlawk hmain goal hnih an thun leh hman. La Liga lama goal thun tluang tak Robert Lewandoski chuan minute 36-naah hma an hruai nawn lehna goal a thun a. Goal hmahruai thuntu Raphinha chuan minute 45-naah an goal thumna a thun zui leh bawk a, 3-1 a hmahruai chungin chawlhlawk an hmang.
Chawlhlawk hnu lamah Barcelona an khel tha chhunzawm a, goal khat an thun belh leh. Insiamthat mamawh tak chunga insiamtha hleithei lo Bayern Munich lakah hian goal hnih thun tawh Raphinha chuan minute 56-naah an goal lina thunin hattrick a siam a, an mualah 4-1 ngawtin hnehna an chang zui ta a ni.
FC Barcelona hian khelh thum atangin point ruk an hmu tawh a. German club lian Bayern Munich hi an tlawm zawn thung a, khelh thum atangin point thum chiah an la hmu ve thung.
An mualah Barcelona an chak laiin La Liga club lian Atletico Madrid erawh chu an mikhual Lille hneh lovin an tlawm ve thung.
Atletico Madrid hian an mualah bul an tan tha viau a, minute 8-na lekah Julián Álvarez chuan hmahruaina goal a thun nghal. Hma takah goal thun mah se an tang tluan zo lo a, hun tawp dawn hnaih lamah goal thum an chhuah. Lille tan hian Edon Zhegrova chuan minute 61-naah goal thunin an si phurh a sut a. Minute 74-naah Jonathan David-a’n penalty atanga hma an hruai letna goal a thun hnuin amah vek hian minute 89-naah an goal thumna a thun zui leh bawk a, mualneitu Atletico Madrid hi 3-1 in an hneh let ta daih a ni.