Bayern Munich-in Mane an ‘suspend’

Bayern Munich-in Mane an ‘suspend’
Champions League lama mualneitu Manchester City laka sithum faia an tlawm tum tunkar Thawhlehni khan Bayern Munich player langsar pahnih Sadio Mane leh a team-mate Leroy Sane chu khelmualah inhnilbuaiin, an team-mate dangte pawhthen ngai khawpa an inbakkaihna lamah Mane hian Sane hmaiah kut a thlak a, German champion chuan thu leh awm hma atan an mihang forward Mane hi an ‘suspend’ tih an puang a, Inrinni Bundesliga lama Hoffenheim an hmachhawn turah pawh squad-ah telh a ni lo.
Germany ram media-te tarlan danin, Etihad Stadium-a an chak loh tum khan Mane hian Sane hmaiah a beng a, an in-bakkaih zui chu pawhthen an ngai hial a; a hnuah Bayern chuan Senegal forward Mane chu nungchang mawi lo avangin an ‘suspend’ zui nghal a, pawisa chawi turin an ti bawk.
Ningania Bayern thuchhuah chuan kum 31 mi Sadio Mane chu Inrinni home match-a 1899 Hoffenheim mikhual tur FC Bayern squad-ah telh a ni lo tiin an tarlang a; a chhan sawi nghalin, Bayern Champions League match-a Manchester City an hmachhawn tuma a nungchang mawi lo vang a nih thu leh sum an chawitir tur thu an tarlang tel.
Bild chanchinbu tarlan danin, Liverpool player hlui Mane hi an chak loh hnu khan Germany winger Sane-a’n a tawngkhum danah a lungawi lo a, an inhnial lawk chhoh hnuah African footballer of the year atana tum hnih thlan tawh Senegalese insum zo lo hian kut a thawh zui ta mai niin an chhuah.
Germany rama an thlawhkir leh hnuah Mane hi airport atangin a hrana hruai haw a ni a, Sane erawh team bus-ah a chuang thung.
Hei hi an dinhmun ni bawk mah se Ningani khan an pahnih hian training an zawm zui leh nghal.
Mane leh Sane hian an intihbuai chungchangah he thu buatsaih lai thleng hian vantlang hriatah thuchhuah an la siam lo ve ve a, an thiamloh thu emaw ngaihdam dilna lam thu emaw pawh an ka atangin hriat tur a la awm lo chhunzawm zel rih.
Karleh Nilaini hian Champions League quarter-final second leg lamah Bayern hian England rama sithum faia an ngam loh City an mikhual ve thung dawn a, an hnufual tawhna atanga kirlehna ropui beisei thei turin team chhung boruak muanawm an mamawh ngeiin a rinawm!
Mane hi nikum June thla khan Bayern chuan Liverpool atangin pound makta-duai 35-in an leichhuak a, kum thum daih inremna ziahpuiin, a hnu lawkah Polish striker Robert Lewandowski chuan German champion chhuahsanin Barcelona a pan zui ve bawk.
Bavarians thuam a inbel tir lamah khan Mane chetha nghalin, inelna hrang hranga a match hmasa pasarihah goal ruk a tilut tling a, mahse, nikum October thla atang khan Thawhlehnia Manches-ter City an hneh loh thlengin goal a la khung leh ta miah lo a, Poland interna-tional hmunruak luah zo lo hlea ngaih a ni chho mek rih!
Liverpool tan game 269 khela goal 120 thun tling Mane hian nikum November thlaa Bayern tana a khelh laia a khup a tihnat avang khan ram tan Qatar World Cup a khel thei lo a, khami tuma a hliam avang khan club game kua a khelh theih loh phah bawk a, Bundesliga lama a insawn hi a tifuh lutuk dawn lo niin a lang!