Bayern tan Kane-a goal hnih

Nilaini German Cup-ah Bundesliga champion Bayern Munich chuan hnehnain bul an tan a, 3-2-a mualneitu third-tier Wehen Wiesbaden an hnehna goal hnih kha England captain Harry Kane-a thawh a ni.
Kane hian first half minute 16-na lekah penalty atangin Bayern hmahruaina goal a chhuihlut a; second half tir lama Michael Olise goal nen Bavarians-in sihnih faiin hma an hruai hman zet a, mahse, Fatih Kaya chuan second half laihawl thlen hnaih tawh lamah minute ruk chhunga goal hnih khungin mualneitu team siphurh pahnih a sut zo ta mai a, Munich club tan inthlahdah a rem ta lo!
Minute 76-ah England forward Kane chuan penalty dang chhuih lehin, an hmahruaina neilet turin hun tha hmu mah se a penalty chhuih chu Wiesbaden goalkeeper Florian Stritzel chuan dansakin, ball perlet tauhluh tuma Kane-a tauh leh shot thlengin he goal-veng hian a dansak fai leng!
Inhnehtawk chungin hun pangngai an hmang zo thei takngial dawna a lan hnu minute li pekbelh a liam hma chiahin Kane hian Bayern chakna goal ni zui ta a khung a, Pathianni second round-ah Bundesliga giants an tel dawn.
Kane khan Nilainia a penalty thun loh hma zawng khan Bayern Munich tana penalty vawi 22 a chhuih chu goal-ah a chantir fai vek a; 2022 World Cup hnu lama penalty tum 33 a chhuihah a zawnin a thun fai vek bawk – Wiesbaden keeper-in a dansak hma zawng khan!