BCM-in Pay Commission din

Baptist Church of Mizoram rorelna sang ber, Assembly vawi 128-na neih mekah Pay Commission 12-na din a ni.
Assembly rorel ni khatnaah hian BCM president Rev KV Thanga’n palai lawmna thu a sawi zawhah president thar Rev F Ramdinmawia hnenah president nihna a hlan a, a ni hian rorel a kaihruai nghal a ni.
Hun hmasa lamah kum 2023 Assembly leh 2024 Assembly inkara ordained pastor leh kohhran upa kal ta te sunna hun hman a ni a, tun tumah hian pastor pathum leh kohhran upa 70, an vaiin mi 73 sun an ni.
Report hrang hrang ngaihthlak a ni a; general secretary-in Finance report-a a tarlan danin, April 2023 atanga February 2024 BCM thawhlawm (target) atanga sum hmuh tawh zat chu Rs. 71,99,70,049 a ni a, 2023- 2024 atana target pumpui atangin 87.19 a lut tawh a, target la tlin lohna hi Rs. 688,09,833 (8.33 %) a ni.
Statistician report-a tarlan zingah BCM hi ABC 17 awmin, Pastor bial 92 leh tualchhung kohhran 678 an awm a; kohhran member 179280 niin, kum hmasa aia member punna 2876 a ni. AGS – Mission report chuan, Mission field 25-ah rawng bawl mek a ni a, missionary leh mission hnuaiah thawktu 1343 an awm. Kum 2023 chhungin kohhran thar 16 leh fellowship 15 dinin, ringthar 4689 an nei.
President-elect atan Rev Dr C Vanlaldika, tuna AICS principal nilai chu thlan a ni a, statistician atan Upa J Lawmsanga, Serkawn thlan a ni. Ningania rorelah hian Mizoram chhung leh pawn hmun hrang hranga palai tur ruat an nih bakah Assembly Committee hrang hrang member tur ruat an ni a. Pay Commission vawi 12-na din a ni a, member 12 ruat nghal an ni.